കോട്ടയം: വീട്ടിലെ തൊട്ടിലില് കിടന്നുറങ്ങിയ പിഞ്ചുകുഞ്ഞിനെ നാടോടി സ്ത്രീ തട്ടികൊണ്ടുപോകാന് ശ്രമിച്ച സംഭവത്തില് അന്വേഷണം ഊര്ജിതമാക്കി പൊലീസ്. കോട്ടയം ഈസ്റ്റ് പൊലീസാണ് അന്വേഷണം നടത്തുന്നത്.
കഴിഞ്ഞ ദിവസം രാവിലെ 11 മണിയോടെയാണ് കുഞ്ഞനെ തട്ടിക്കൊണ്ടു പോകാന് ശ്രമിച്ചത്.പുതുപ്പള്ളി അങ്ങാടി പട്ടമഠത്തില്കുന്നേല് പി.ബി.സുധീഷ് – ഗീതു ദമ്പതികളുടെ എട്ട് മാസം പ്രായമുള്ള ആണ്കുഞ്ഞിനെയാണ് തട്ടിക്കൊണ്ടുപോകാന് ശ്രമിച്ചത്.
കുഞ്ഞിനെ തൊട്ടിലില്നിന്നും നാടോടി സ്ത്രീ എടുത്തുകൊണ്ട് പോയത് കണ്ട് അമ്മ പിന്നാലെ ഓടിയെത്തി പിടിച്ചു വാങ്ങുകയായിരുന്നു. നാടോടി സ്ത്രീ ഗീതുവിനെ അക്രമിച്ചെങ്കിലും കുഞ്ഞിനെ കൈപ്പിടിയിലൊതുക്കാന് കഴിഞ്ഞു. സംഭവമറിഞ്ഞ ഉടന് സ്ഥലത്തെത്തിയ പൊലീസ് പ്രദേശത്തെ ഇടറോഡുകള് ഉള്പ്പെടെ അരിച്ചുപെറുക്കിയെങ്കിലും കുഞ്ഞിനെ തട്ടിക്കൊണ്ടുപോകാന് ശ്രമിച്ച നാടോടി സ്ത്രീയെ കണ്ടെത്താന് കഴിഞ്ഞില്ല.
സംഭവവുമായി ബന്ധമുണ്ടെന്നു കരുതി മൂന്ന് നാടോടി സ്ത്രീകളെ പൊലീസ് പിടികൂടിയെങ്കിലും പീന്നിട് വിട്ടയച്ചു. സ്ഥലത്തെ സിസിടിവി ഉള്പ്പെടെ പരിശോധിച്ചെങ്കിലും ആരുടെയും ദൃശ്യങ്ങള് ലഭിച്ചില്ല. സംഭവം നടക്കുമ്പോള് ഗീതുവും സുധീഷിന്റെ രോഗിയായ മാതാവും മാത്രമാണ് വീട്ടിലുണ്ടായിരുന്നത്.
വാതില് പുറത്തുനിന്നും കുറ്റിയിട്ടശേഷം അമ്മ ഗീതു ശുചിമുറിയില്പോയ സമയത്താണ് അകത്തുകയറിയ നാടോടി സ്ത്രീ കുഞ്ഞുമായി കടന്നുകളഞ്ഞത്.എന്നാല് ശബ്ദം കേട്ടു ശുചിമുറിയില്നിന്നും പുറത്തു വന്ന ഗീതു വാതില് തുറന്നുകിടക്കുന്നതാണ് കണ്ടത്.
ഉടന് വീടിനുള്ളില് കയറി കുഞ്ഞിനെ നോക്കിയെങ്കിലും കണ്ടില്ല. ഓടി പുറത്തിറങ്ങിയപ്പോള് ചുരിദാര് ധരിച്ച സ്ത്രീ കുഞ്ഞുമായി പോകുന്നതു കണ്ടു. പിന്നാലെ ഓടിയ ഗീതു കുഞ്ഞിനെ നാടോടി സ്ത്രീയുടെ കൈയില്നിന്നും പിടിച്ചുവാങ്ങുകയായിരുന്നു.. ഈ സമയം ഗീതുവിനെ ആക്രമിച്ച നാടോടി സ്ത്രീ ഓടി രക്ഷപ്പെട്ടു.
