തിരുവനന്തപുരം : നടന് മോഹന്രാജ് ഇനി ഓര്മ്മ.സംസ്കാരം വൈകിട്ട് തിരുവനന്തപുരം കാഞ്ഞിരംകുളത്തെ കുടുംബ വീട്ടു വളപ്പില് നടന്നു.
ഇളയ മകള് കാവ്യ ചിതക്ക് തീ പകര്ന്നു. സംസ്കാര ചടങ്ങില് സിനിമ മേഖലയിലെ സുഹൃത്തുക്കള് അടക്കം ആയിരങ്ങളാണ് പങ്കെടുത്തത്. ഉച്ചക്ക് കാഞ്ഞിരംകുളത്തു നടന്ന പൊതുദര്ശനത്തിലും നിരവധി പേര് അന്തിമോപചാരം അര്പ്പിച്ചു.
മലയാളം, തമിഴ്, തെലുങ്ക്, കന്നഡ എന്നീ ഭാഷകളിലായി 300ഓളം സിനിമകളില് വേഷമിട്ട മോഹന്രാജ് കഥാപാത്രത്തിന്റെ പേരിലാണ് അറിയപ്പെട്ടിരുന്നത്. സിബി മലയിലിന്റെ ‘കിരീട’ത്തിലെ കീരിക്കാടന് ജോസ് എന്ന വില്ലന് കഥാപാത്രത്തെ അനശ്വരമാക്കിയ നടന് പിന്നീട് ആ പേരിലാണ് അറിയപ്പെട്ടത്.
കിരീടത്തില് വേഷമിടുന്നതിനു മുമ്പായി ആണ്കളെ നമ്പാതെ, കഴുഗുമലൈ കള്ളന് എന്നിങ്ങനെ രണ്ട് തമിഴ് സിനിമകളില് വില്ലന് വേഷത്തില് വേഷമിട്ടിരുന്നു. മലയാളത്തില് കെ മധുവിന്റെ മൂന്നാംമുറയില് കൊള്ളക്കാരിലൊരാളായും പ്രത്യക്ഷപ്പെട്ടിരുന്നു മോഹന്രാജ്.
2022ല് റിലീസ് ചെയ്ത റോഷാക്കായിരുന്നു അവസാനചിത്രം. തിരുവനന്തപുരം ഗവ. ആര്ട്സ് കോളേജില് നിന്ന് ഇക്കണോമിക്സില് ബിരുദം നേടിയശേഷം സൈന്യത്തിലും കസ്റ്റംസിലും എന്ഫോഴ്സ്മെന്റിലും സേവനമനുഷ്ഠിച്ചിരുന്നു. ഭാര്യ ഉഷ. ജയ്ഷമ, കാവ്യ എന്നിവരാണ് മക്കള്.
