ഷിരൂർ: ഗംഗാവലി പുഴയിൽ ഇന്ന് നടത്തിയ തെരച്ചിലിൽ അർജുന്റെ ലോറി കണ്ടെത്തി. സിപി2 കേന്ദ്രീകരിച്ച് നടത്തിയ തെരച്ചിലിലാണ് ലോറി കണ്ടെത്തിയത്. ഒരു മാസത്തിലേറെയായി പല ഘട്ടങ്ങളിലായി നടത്തിയ തിരച്ചിലിനൊടുവിലാണ് ലോറി കണ്ടെത്തിയത്. ‘അർജുനും’ ലോറിയിലുണ്ടെന്ന് മനാഫ് പറഞ്ഞു. മനാഫ് ലോറി സ്ഥിരീകരിച്ചിട്ടുണ്ട്.
അര്ജുനെ കാണാതായിട്ട് ഇന്ന് 71 ദിവസം പൂര്ത്തിയായിരിക്കുന്നു.ലോറിയുടെ ക്യാബിനാണ് പുറത്തെത്തിച്ചത്. ഓഗസ്റ്റ് പതിനാറിന് നിർത്തിവെച്ച രക്ഷാപ്രവർത്തനമാണ് ഗോവയില് നിന്ന് ഡ്രഡ്ജർ എത്തിച്ചതോടെ പുനരാരംഭിച്ചത്. ജൂലൈ പതിനാറിന് ഷിരൂരില് ഉണ്ടായ മണ്ണിടിച്ചിലിലാണ് അര്ജുനെ കാണാതായത്. അര്ജുനൊപ്പം ലോറിയും കാണാതായി.
അര്ജുനെ കാണാനില്ലെന്ന് കാണിച്ച് മാതാപിതാക്കള് പരാതി നല്കിയെങ്കിലും തുടക്കത്തില് അലസ മനോഭാവമാണ് ഭരണകൂടം കാണിച്ചത്. സംഭവം വിവാദമാവുകയും കേരളത്തിന്റെ ഇടപെടലുണ്ടായതിനും പിന്നാലെ തിരച്ചില് നടത്താന് ഭരണകൂടം തയ്യാറായി.
മണ്ണിടിച്ചിലുണ്ടായ പ്രദേശത്ത് ലോറി അകപ്പെട്ടതാകാമെന്നായിരുന്നു ആദ്യം ഉയര്ന്ന സംശയം. ഇതിന്റെ അടിസ്ഥാനത്തില് മണ്ണിടിച്ചിലുണ്ടായ പ്രദേശത്തെ മണ്ണ് നീക്കം ചെയ്ത് പരിശോധന നടത്തി. എന്നാല് ലോറി കണ്ടെത്താനായിരുന്നില്ല. തുടര്ന്നാണ് സോണാര് പരിശോധനയില് ഗംഗാവലി പുഴയില് ലോഹ സാന്നിധ്യം കണ്ടെത്തിയത്. എന്നാല് മോശം കാലാവസ്ഥയും പുഴയിലെ ശക്തമായ അടിയൊഴുക്കും രക്ഷാപ്രവര്ത്തനത്തിന് വെല്ലുവിളിയാവുകയായിരുന്നു.
തുടന്ന് അര്ജുന്റെ മാതാപിതാക്കള് കര്ണാടക മുഖ്യമന്ത്രി സിദ്ധരാമയ്യയെ കണ്ട് തിരച്ചില് പുനരാരംഭിക്കണമെന്ന് അഭ്യര്ത്ഥിച്ചിരുന്നു. ഇതിന്റെ അടിസ്ഥാനത്തില് കൂടിയാണ് സാങ്കേതിക പ്രശ്നങ്ങള് പരിഹരിച്ച് തിരച്ചില് പുനരാരംഭിക്കാന് സര്ക്കാര് തീരുമാനിച്ചത്.
