കോട്ടയം: ടിടിഇ ചമഞ്ഞ് ട്രെയിനില്‍ പരിശോധന നടത്തിയ കൊല്ലം കാഞ്ഞവേലി മുതുക്കാട്ടില്‍ റംലത്ത് (42) പിടിയില്‍. വെള്ളിയാഴ്ച രാവിലെ തിരുവനന്തപുരത്തുനിന്ന് പുറപ്പെട്ട രാജ്യറാണി എക്‌സ്പ്രസിലായിരുന്നു യുവതിയുടെ പരിശോധന.
ട്രെയിന്‍ കൊല്ലത്തെത്തിയപ്പോഴാണ് ടിടിഇയുടെ വേഷത്തില്‍ യുവതി പരിശോധന നടത്തുന്നത് ശ്രദ്ധയില്‍പ്പെട്ടത്. ദക്ഷിണ റെയില്‍വേയുടെ ടാഗോടുകൂടിയ ഐഡി കാര്‍ഡും കഴുത്തിലണിഞ്ഞിരുന്നു.
യഥാര്‍ഥ ടിടിഇ സംശയം തോന്നി ചോദിച്ചപ്പോഴാണ് തട്ടിപ്പ് വെളിച്ചത്ത് വന്നത്. ട്രെയിന്‍ കോട്ടയത്തെത്തിയപ്പോള്‍ റെയില്‍വേ പൊലീസ് റംലത്തിനെ പിടികൂടുകയായിരുന്നു.
ഹോം നഴ്‌സായി ജോലി ചെയ്യുകയാണെന്നാണ് ചോദ്യം ചെയ്യലില്‍ ഇവര്‍ പൊലീസിനോട് പറഞ്ഞത്. യാത്രാസൗകര്യത്തിനായാണ് ടിടിഇ വേഷം കെട്ടിയതെന്നും വെളിപ്പെടുത്തി. പ്രതിയെ റിമാന്‍ഡ് ചെയ്തു.
