കോട്ടയം : യുഡിഎഫ് ഭരണത്തിലുളള കോട്ടയം നഗരസഭയില്‍ ഉത്രാട നാളില്‍ ഐഎന്‍ടിയുസിയുടെ സമരം. ശുചീകരണ തൊഴിലാളികളുടെ ഓണം അഡ്വാന്‍സും ബോണസും നല്‍കാത്തതില്‍ പ്രതിഷേധിച്ചാണ് സമരം. സെക്രട്ടറി ഫയലില്‍ ഒപ്പിടാതെ പോയതോടെ അഡ്വാന്‍സും ബോണസും ഓണത്തിന് ശേഷമേ ലഭിക്കൂ.
കോട്ടയം നഗരസഭയില്‍ ശുചീകരണ ജോലി ചെയ്യുന്നത് 200 ഓളം തൊഴിലാളികളാണ്. ഇതില്‍ സ്ഥിരം ജോലിക്കാരായവര്‍ക്ക് ഓണം അഡ്വാന്‍സ് ലഭിച്ചില്ല. താല്‍ക്കാലിക ജീവനക്കാര്‍ക്ക് ബോണസും കിട്ടിയില്ല.
ഉത്രാട ദിവസം ആയിട്ടും പണം അക്കൗണ്ടില്‍ വരാത്തതിനെ തുടര്‍ന്ന് പ്രതിഷേധവുമായി നഗരസഭയുടെ മുന്നിലേക്ക് ഇവര്‍ എത്തുകയായിരുന്നു.
ഇരുന്നൂറോളം തൊഴിലാളികള്‍ക്കാണ് ഓണം ആനുകൂല്യങ്ങള്‍ ലഭിക്കാതെ പോയത്. യുഡിഎഫ് ഭരിക്കുന്ന നഗരസഭയായിട്ടും ഐഎന്‍ടിയുസി തന്നെയാണ് ഈ സമരത്തിന് നേതൃത്വം നല്‍കിയത്. ഉദ്യോഗസ്ഥരുടെ അനാസ്ഥ മൂലമാണ് ഈ സ്ഥിതി ഉണ്ടായതെന്നാണ് ആക്ഷേപം.
