ഊട്ടിയില്‍ കണ്ടെത്തിയ വിഷ്ണു ജിത്തിനെ മലപ്പുറം പൊലീസ് സ്‌റ്റേഷനിലെത്തിച്ചു; നാടുവിടാന്‍ കാരണം സാമ്പത്തിക പ്രതിസന്ധി

മലപ്പുറം: വിവാഹം നടക്കാനിരിക്കെ മലപ്പുറത്ത് നിന്ന് കാണാതായി ഊട്ടിയില്‍ കണ്ടെത്തിയ വിഷ്ണു ജിത്തിനെ മലപ്പുറം പൊലീസ് സ്‌റ്റേഷനിലെത്തിച്ചു

വിഷ്ണു ജിത്തിനെ കണ്ടെത്തുന്നത് കാണാതായി ആറാം ദിവസമാണ് . സാമ്പത്തിക പ്രതിസന്ധിയാണ് നാടു വിടാന്‍ കാരണമെന്ന് വിഷ്ണു ജിത്ത് പൊലീസിനോട് പറഞ്ഞു. ഇയാളെ കണ്ടെത്താന്‍ തമിഴ്‌നാട് പൊലീസും സഹായിച്ചു. ഫോണ്‍ ഓണായതാണ് യുവാവിനെ കണ്ടെത്താന്‍ തുമ്പായത്.

വിവാഹത്തിന് സുഹൃത്തില്‍ നിന്ന് കടം വാങ്ങിയ ഒരു ലക്ഷം രൂപയില്‍ അമ്പതിനായിരം രൂപ നഷ്ടപ്പെട്ടു. പതിനായിരം രൂപ വീട്ടിലേക്ക് അയച്ച ശേഷം ബാക്കി കയ്യിലുണ്ടായിരുന്നത് നാല്‍പതിനായിരം രൂപ മാത്രമായിരുന്നു. ഈ പണം വിവാഹത്തിന് തികയില്ലെന്ന ആശങ്കയിലാണ് നാടുവിട്ടതെന്നും വിഷ്ണു ജിത്ത് പറഞ്ഞു.

ഊട്ടിയില്‍ നിന്ന് പരിചയമില്ലാത്ത ഒരാളുടെ ഫോണ്‍ വാങ്ങി വീട്ടിലേക്ക് വിളിച്ചു. ഈ വിളി പിന്തുടര്‍ന്നാണ് പൊലീസ് ഇയാളെ കണ്ടെത്തിയത്.

ഈ മാസം നാലാം തീയതിയാണ് മലപ്പുറം പള്ളിപ്പുറം സ്വദേശി വിഷ്ണുജിത്തിനെ കാണാതാകുന്നത്. കുറച്ച് പണം ലഭിക്കാനുണ്ടെന്നും ഉടന്‍ തിരിച്ച് വരാമെന്നും പറഞ്ഞാണ് വിഷ്ണുജിത്ത് പാലക്കാട്ടേക്ക് പോയത്. എന്നാല്‍ പിന്നീട് ഫോണ്‍ സ്വിച്ച് ഓഫായി. പാലക്കാട് കഞ്ചിക്കോട് ഐസ്‌ക്രീം കമ്പനിയില്‍ ജീവനക്കാരനായ വിഷ്ണുജിത്തിന്റെ വിവാഹം ഞായറാഴ്ച നടക്കേണ്ടതായിരുന്നു.

മഞ്ചേരി സ്വദേശിനിയാണ് വധു. നാലാം തീയതി വിഷ്ണു പാലക്കാട് ബസ്റ്റാന്റില്‍ നിന്നും കോയമ്പത്തൂരിലേക്കുള്ള ബസ് കയറുന്ന സിസിടിവി ദൃശ്യം പുറത്ത് വന്നിരുന്നു.