തിരുവനന്തപുരം: കേരള ക്രിക്കറ്റ് ലീഗ് അഞ്ചാം ദിവസത്തെ രണ്ടാമത്തെ മല്സരത്തില് കാലിക്കറ്റ് ഗ്ലോബ്സ്റ്റാറിനെതിരേ അദാനി ട്രിവാന്ഡ്രം റോയല്സിന് അഞ്ചു വിക്കറ്റ് ജയം. കാലിക്കറ്റ് മുന്നോട്ടുവെച്ച 144 റണ്സ് വിജയലക്ഷ്യം 18.1 ഓവറില് അഞ്ചു വിക്കറ്റ് നഷ്ടത്തില് മറികടന്നാണ് ട്രിവാന്ഡ്രം റോയല്സ് വിജയം സ്വന്തമാക്കിയത്. ടൂര്ണമെന്റിലെ അതിവേഗ അര്ധ സെഞ്ചുറി നേടിയ ക്യാപ്റ്റന് അബ്ദുള് ബാസിദ് ടീമിൻറെ വിജയശിൽപിയായി. 22 പന്തില് പുറത്താകാതെ 50 റണ്സ് അബ്ദുള് ബാസിദ് അടിച്ചെടുത്തു.
145 റണ്സ് വിജയലക്ഷ്യവുമായി ബാറ്റിംഗിനിറങ്ങിയ ട്രിവാന്ഡ്രം റോയല്സിന് ആദ്യ ഓവറിലെ മൂന്നാം പന്തില് വിഷ്ണു രാജിനെ നഷ്ടമായി. റിയാസ് ബഷീര്- ഗോവിന്ദ് പൈ കൂട്ടുകെട്ട് ടീം സ്കോര് 69 വരെ എത്തിച്ചു. അഞ്ചു ബൗണ്ടറി ഉള്പ്പെടെ 38 റണ്സ് റിയാസ് ബഷീര് നേടി. 34 പന്തില് 35 റണ്സ് നേടിയ ഗോവിന് പൈയെ എം. അജ്നാസ് മികച്ച ഒരു ത്രോയില് റണ് ഔട്ടാക്കി. തുടര്ന്നെത്തിയ ക്യാപ്റ്റന് അബ്ദുള് ബാസിദ് സ്കോറിംഗ് വേഗത്തിലാക്കി. നിഖില് എറിഞ്ഞ 13-ാം ഓവറില് 26 റണ്സാണ് അബ്ദുള് ബാസിദ് അടിച്ചുകൂട്ടിയത്. 19-ാം ഓവറിലെ ആദ്യ പന്ത് ബൗണ്ടറിയിലേക്ക് പായിച്ച് എം.എസ് അഖില് റോയല്സിന് വിജയ റണ്സ് സമ്മാനിച്ചു.
ടോസ് നഷ്ടമായി ആദ്യം ബാറ്റിംഗിനിറങ്ങിയ കാലിക്കറ്റ് ഗ്ലോബ്സ്റ്റാറിന് ഓപ്പണറും ക്യാപ്റ്റനുമായ രോഹന് കുന്നുമ്മലിനെ റണ്ണൊന്നുമെടുക്കുന്നതിനു മുമ്പേ നഷ്ടമായി. സല്മാന് നിസാര്- എം. അജ്നാസ് കൂട്ടുകെട്ട് ടീം സ്കോര് 75 വരെ എത്തിച്ചു. 48 പന്തില് നിന്നും ആറു സിക്സറുകളും രണ്ട് ബൗണ്ടറിയും ഉള്പ്പെടെ 72 റണ്സാണ് സല്മാന് അടിച്ചെടുത്തത്. ഈ ചെറുത്ത് നിൽപാണ് കാലിക്കറ്റ് ഗ്ലോബ്സ്റ്റാറിന്റെ സ്കോര് 20 ഓവറില് ആറു വിക്കറ്റ് നഷ്ടത്തില് 144 -ല് എത്തിച്ചത്.
ട്രിവാന്ഡ്രം റോയല്സിന്റെ അബ്ദുള് ബാസിത് ആണ് പ്ലെയര് ഓഫ് ദി മാച്ച്
