ഇടുക്കി: സ്വകാര്യ ബസ് മോഷ്ടിച്ച് കടന്നുകളയുന്നതിനിടെ ബസ് അപകടത്തില്പ്പെട്ടു. സര്വീസ് അവസാനിപ്പിച്ച് നിര്ത്തിയിട്ട ബസാണ് മോഷ്ടിച്ച് കടന്നത്. അപകടം ഉണ്ടായതിന് പിന്നാലെ വാഹനം ഉപേക്ഷിച്ച് മോഷ്ടാവ് രക്ഷപെട്ടു. ഇടുക്കി മുനിയറയില് സര്വീസ് അവസാനിപ്പിച്ച ശേഷം നിര്ത്തിയിട്ട സ്വകാര്യ ബസാണ് മോഷണം പോയത്. അടിമാലി – നെടുങ്കണ്ടം റൂട്ടില് സര്വീസ് നടത്തുന്ന നക്ഷത്ര എന്ന സ്വകാര്യ ബസാണ് മോഷണം പോയത്. ഇന്നലെ രാത്രിയാണ് സംഭവം.
ബസുമായി മോഷ്ടാവ് കടന്നുകളയുന്നതിന്റെ സിസിടിവി ദൃശ്യങ്ങള് കേന്ദ്രീകരിച്ച് അന്വേഷണം നടത്തുന്നതിനിടെ ഇന്ന് പുലര്ച്ചെ ബൈസണ്വാലിക്ക് സമീപം നാല്പതേക്കറില് നിന്നുമാണ് ബസ് കണ്ടെത്തിയത്. മോഷ്ടാവ് വാഹനവുമായി കടന്നുകളയുന്നതിനിടെ വാഹനം അപകടത്തില്പ്പെട്ടു. ബൈസണ്വാലി നാല്പതേക്കറിന് സമീപം നിയന്ത്രണം നഷ്ട്ടപ്പെട്ട വാഹനം സമീപത്തെ ഇലക്ട്രിക്ക് പോസ്റ്റ് തകര്ത്ത് മണ്തിട്ടയില് ഇടിച്ചാണ് നിന്നത്.
ബസിന്റെ മുന്ഭാഗം പൂര്ണ്ണമായി തകര്ന്നതിനാല് മോഷ്ടാവ് വാഹനം ഉപേക്ഷിച്ച് രക്ഷപെടുകയായിരുന്നുവെന്നാണ് പൊലീസ് പ്രതികരണം. ഉടമയുടെ പരാതിയില് രാജാക്കാട് പൊലീസ് അന്വേഷണം ആരംഭിച്ചു. സമാനമായ മറ്റൊരു സംഭവം ഇന്ന് പുലര്ച്ചെ കുന്നംകുളത്തും നടന്നിരുന്നു. കുന്നംകുളം പുതിയ ബസ്റ്റാന്ഡില് നിന്നാണ് ബസ് മോഷണം പോയത്.
