കൊല്ക്കത്ത: ബംഗാളിലെ ആര്ജി കര് മെഡിക്കല് കോളജില് പിജി ഡോക്ടറുടെ കൊലപാതകത്തില് കൂടുതല് സിസിടിവി ദൃശ്യങ്ങള് കണ്ടെടുത്തു. കേസില് അറസ്റ്റിലായ സഞ്ജയ് റോയ് ഡോക്ടറെ നേരത്തെയും പിന്തുടര്ന്നതായാണ് റിപ്പോര്ട്ട്. ആഗസ്ത് ഒന്പതിനാണ് ഡോക്ടര് കൊല്ലപ്പെട്ടത്. ഇതിന് ഒരു ദിവസം മുന്പ് ഡോക്ടറെ, ചെസ്റ്റ് മെഡിസിന് വാര്ഡില് വച്ച് താന് പിന്തുടര്ന്നിരുന്നുവെന്ന് ഇയാള് പോലീസിന് മൊഴി നല്കിയിരുന്നു.
മുപ്പത്തിമൂന്നുകാരനായ സഞ്ജയ് റോയ് കൊല്ലപ്പെട്ട ഡോക്ടറേയും മറ്റ് നാല് ജൂനിയര് ഡോക്ടര്മാരേയും തുറിച്ച് നോക്കി ഇരിക്കുന്നതായി ദൃശ്യങ്ങളില് കാണാം. ഒന്പതിന് പുലര്ച്ചെ ഒന്നോടെയാണ് ഡോക്ടര് സെമിനാര് ഹാളിലേക്ക് വിശ്രമിക്കാനായി എത്തുന്നത്. മറ്റൊരു ജൂനിയര് ഡോക്ടറുമായി പുലര്ച്ചെ 2.30 വരെ സംസാരിച്ചിരുന്നു. ശേഷമാണ് ഡോക്ടര് ഉറങ്ങാന് കിടന്നത്. പിറ്റേന്ന് പുലര്ച്ചെ യുവതിയെ മരിച്ച നിലയില് കണ്ടെത്തുകയായിരുന്നു. രാവിലെ നാല് മണിയോടെ സഞ്ജയ് റോയ് ഈ കെട്ടിടത്തിന് അടുത്തേക്ക് വരുന്നതും സിസിടിവി ദൃശ്യങ്ങളിലുണ്ട്. ഇയാള് കടുത്ത മനോവൈകൃതങ്ങള് പ്രകടിപ്പിക്കുന്ന ആളാണെന്നും അശ്ലീല ചിത്രങ്ങള്ക്ക് അടിമയാണെന്നും സിബിഐ ഉദ്യോഗസ്ഥര് പറയുന്നു.
ചോദ്യം ചെയ്യലിന്റെ ഒരു ഘട്ടത്തില് പോലും ഇയാള് പശ്ചാത്താപം പ്രകടിപ്പിച്ചിട്ടില്ല. കുറ്റകൃത്യത്തിലെ ഓരോ സംഭവങ്ങളും വളരെ വ്യക്തമായി തന്നെ ഉദ്യോഗസ്ഥര് മുന്നില് വിവരിക്കുകയും ചെയ്തിരുന്നു.
