തൃശൂര്: റഷ്യയിലെ ഉക്രൈന് ഷെല്ലാക്രമണത്തില് തൃശൂര് സ്വദേശി കൊല്ലപ്പെട്ട സംഭവത്തില് മരിച്ച സന്ദീപിന്റെ റഷ്യന് യാത്ര അന്വേഷിക്കുമെന്ന് തൃശ്ശൂര് റൂറല് എസ്പി.
ചാലക്കുടി ഡിവൈഎസ്പിക്കാണ് അന്വേഷണ ചുമതല. തൃശ്ശൂര് തൃക്കൂര് നായരങ്ങാടി കാഞ്ഞില് വീട്ടില് സന്ദീപ് ചന്ദ്രനാണ് റഷ്യന് സൈനിക സംഘത്തിന് നേരെയുണ്ടായ ഉക്രൈന് ഷെല്ലാക്രമണത്തില് കൊല്ലപ്പെട്ടത്. ചാലക്കുടിയിലെ ഏജന്സി വഴി കഴിഞ്ഞ ഏപ്രില് രണ്ടിനാണ് സന്ദീപും മലയാളികളായ മറ്റു ഏഴ് പേരും റഷ്യയിലേക്ക് പോയത്.
സന്ദീപ് ഉള്പ്പെടെ റഷ്യന് സേനയുടെ 12 അംഗ പട്രോളിങ് സംഘം ഉക്രൈന് ഷെല്ലാക്രമണത്തില് കൊല്ലപ്പെട്ട വിവരം മലയാളി അസോസിയേഷന് വഴിയാണ് കുടുംബം അറിഞ്ഞത്. ചാലക്കുടിയിലെ ഏജന്സി വഴി സന്ദീപ് റസ്റ്റോറന്റ് ജോലിക്കാണ് വിദേശത്ത് പോയതെന്ന് വിവരം. റഷ്യന് സൈനിക ക്യാമ്പിലെ കാന്റീനിലാണ് ജോലിയെന്നും സുരക്ഷിതനെന്നും സന്ദീപ് വീട്ടില് അറിയിച്ചിരുന്നു. പിന്നീട് വിളിച്ചപ്പോള് പാസ്പോര്ട്ടും ഫോണും കളഞ്ഞുപോയെന്ന് സന്ദീപ് പറഞ്ഞതായും ബന്ധുക്കള് പറയുന്നു.
സന്ദീപിനെക്കുറിച്ച് വിവരങ്ങള് അറിയണമെന്ന് ആവശ്യപ്പെട്ട് ബന്ധുക്കള് കേന്ദ്രമന്ത്രിമാരായ എസ്. ജയശങ്കര്, സുരേഷ്ഗോപി, ജോര്ജ് കുര്യന് എന്നിവര്ക്ക് പരാതി നല്കിയിട്ടുണ്ട്. നോര്ക്ക വഴി റഷ്യയിലെ ഇന്ത്യന് എംബസിയിലും ബന്ധുക്കള് ബന്ധപ്പെട്ടിട്ടുണ്ട്. സന്ദീപ് റഷ്യന് പൗരത്വം സ്വീകരിച്ചതായും സൈന്യത്തില് ചേര്ന്നതായും വിവരമുണ്ട്. പൗരത്വം ലഭിക്കുന്നതിന് സൈന്യത്തില് ചേരുന്ന സമ്പ്രദായം റഷ്യയിലുണ്ട്. പൗരത്വ പ്രശ്നം മൃതദേഹം നാട്ടിലെത്തിക്കാന് ബുദ്ധിമുട്ടുണ്ടാക്കുമെങ്കിലും എംബസി ഇടപെടുമെന്ന പ്രതീക്ഷയിലാണ് ബന്ധുക്കള്. റഷ്യന് സേനയുടെ ഭാഗമായ സന്ദീപ് സൈനിക പരിശീലനത്തിലായിരുന്നതിനാല് നാട്ടിലേക്ക് ബന്ധപ്പെടാന് കഴിഞ്ഞിരുന്നില്ല.
