തിരുവനന്തപുരം: വയനാട് ഉരുള്‍പൊട്ടല്‍ ദുരന്തബാധിതരുടെ വായ്പയ്ക്ക് ഒരു വര്‍ഷത്തെ മൊറട്ടോറിയം പ്രഖ്യാപിച്ചു. തിരുവനന്തപുരത്ത് സംസ്ഥാനതല ബാങ്കേഴ്‌സ് സമിതി യോഗത്തിലാണ് തീരുമാനം. ഉരുള്‍പൊട്ടലില്‍ മരിച്ച കുടുംബങ്ങളുടെ കണക്ക് അതത് ബാങ്കുകളില്‍ നിന്നെടുക്കും. വെള്ളിയാഴ്ചയ്‌ക്കകം ഇതു പൂര്‍ത്തിയാക്കും. വായ്പ എഴുതിത്തള്ളുന്നതില്‍ അതതു ബാങ്കുകളാണ് അന്തിമ തീരുമാനമെടുക്കേണ്ടത്.
വായ്പ പൂര്‍ണമായും എഴുതിത്തള്ളാന്‍ എസ്എല്‍ബിസിക്ക് അധികാരമില്ല. ദുരന്തത്തിലെല്ലാവരും മരിച്ച കുടുംബങ്ങള്‍, ഗൃഹനാഥനും ഗൃഹനാഥയും മരിച്ച കുടുംബങ്ങള്‍ എന്നിവരുടെ വായ്പ എഴുതിത്തള്ളണമെന്ന് ബാങ്കുകളോട് എസ്എല്‍ബിസി ശിപാര്‍ശ ചെയ്തു.
കൃഷിയിടവും കൃഷിയും നശിച്ചവരുടെ വായ്പ എഴുതിത്തള്ളാന്‍ ബാങ്കുകളോട് യോഗം നിര്‍ദേശിച്ചു. കാര്‍ഷിക വായ്‌പകള്‍ക്ക് അഞ്ചു വര്‍ഷത്തെ സാവകാശം അനുവദിക്കും. ആദ്യ ഒരു വര്‍ഷം മൊറട്ടോറിയമുണ്ട്. അതു ചെറുകിട സംരംഭകര്‍ക്കു കൂടി ബാധകമാക്കാന്‍ ബാങ്കേഴ്‌സ് സമിതി ശിപാര്‍ശ ചെയ്യും.
വയനാട് മുണ്ടക്കൈ ഉരുള്‍പൊട്ടലില്‍ ദുരിതബാധിതര്‍ക്ക് നല്കിയ അടിയന്തര ധനസഹായത്തില്‍ നിന്ന് കേരള ഗ്രാമീണ്‍ ബാങ്ക് ഇഎംഐ പിടിക്കാന്‍ പാടില്ലായിരുന്നു. പിടിച്ച തുക ബാങ്ക് തിരികെ നല്കി. ദുരന്തമേഖലയില്‍ 12 ബാങ്കുകളാണ് വായ്പ നല്കിയത്. ലോണെടുത്തവര്‍ 3220 പേര്‍. 35.32 കോടിയാണ് ആകെ വായ്പ. കൃഷി വായ്‌പയായി 19.81 കോടിയെടുത്തത് 2460 പേര്‍. പ്രൈവറ്റ് ബാങ്കിന്റെ കാര്യം എസ്എല്‍ബിസി പരിധിയില്‍ വരുന്നതല്ല.
