54 മത് സംസ്ഥാന ചലച്ചിത്ര പുരസ്കാരത്തിൽ വാലാട്ടി എന്ന സിനിമയിൽ ഡബ്ബ് ചെയ്തതിന് റോഷൻ മാത്യുവിന് പുരസ്കാരം ലഭിച്ചു. ചിത്രത്തിലെ നായയ്ക്ക് ഡബ്ബ് ചെയ്തതിനാണ് താരത്തെ പുരസ്കാരം തേടിയെത്തിയിരിക്കുന്നത്. ഈ അവാർഡ് ഒട്ടും പ്രതീക്ഷിച്ചിരുന്നില്ല എന്നാണ് പുരസ്കാര പ്രഖ്യാപനത്തിന് പിന്നാലെ റോഷന്റെ പ്രതികരണം. ദേവൻ ജയകുമാർ എഴുതി സംവിധാനം ചെയ്ത് 2023ൽ റിലീസ് ചെയ്ത ചിത്രമാണ് വാലാട്ടി: ടെയിൽ ഓഫ് ടെയിൽസ്. ഫ്രൈഡേ ഫിലിംസിന്റെ ബാനറിൽ സിനിമയുടെ നിർമ്മാണം വിജയ് ബാബു ആയിരുന്നു.
വിഎഫ്എക്സ് ഇല്ലാതെ യഥാർത്ഥ നായ്ക്കളെ അഭിനേതാക്കളായി അവതരിപ്പിച്ച ആദ്യത്തെ ഇന്ത്യൻ സിനിമയാണ് വാലാട്ടി. സിനിമയിൽ റോഷൻ മാത്യുവിനെ കൂടാതെ രവീണ രവി, സൗബിൻ ഷാഹിർ, സണ്ണി വെയ്ൻ, ഇന്ദ്രൻസ്, നസ്ലെൻ, അജു വർഗീസ് തുടങ്ങിയവരുടെ ശബ്ദവും ഉണ്ട്. 70ാംമത് ദേശീയ പുരസ്കാരവും, 54ാംമത് സംസ്ഥാന ചലച്ചിത്ര പുരസ്കാരവുമാണ് ഇന്ന് പ്രഖ്യാപിച്ചത്.സംസ്ഥാന പുരസ്കാരത്തിൽ മികച്ച നടനായി പൃഥ്വിരാജ് സുകുമാരനെ തിരഞ്ഞെടുത്തു. ബ്ലെസ്സി സംവിധാനം ചെയ്ത ആട് ജീവിതത്തിലെ മികച്ച അഭിനയത്തിനാണ് പുരസ്കാരം.
