ന്യൂദൽഹി: സെബി ചെയർപേഴ്സൺ മാധബി പുരി ബുച്ചിന് അദാനി ഗ്രൂപ്പിന്റെ വിദേശത്ത് നിന്നും പണം കടത്താനുള്ള കടലാസ് കമ്പനികളിൽ നിക്ഷേപമുണ്ടെന്ന യുഎസ് ഷോര്‍ട്ട് സെല്ലിംഗ് സ്ഥാപനമായ ഹിൻഡെൻബർഗ് റിപ്പോർട്ട് തള്ളി അദാനി ഗ്രൂപ്പ്. റിപ്പോർട്ട് വാസ്തവ വിരുദ്ധമാണെന്നും വ്യക്തിഗത ലാഭത്തിനുവേണ്ടി തയ്യാറാക്കിയ റിപ്പോർട്ടാണെന്നും അദാനി ഗ്രൂപ്പ് അറിയിച്ചു. . .
പൊതുവായി ലഭിക്കുന്ന വിവരങ്ങളിൽ കൃത്രിമത്വം ഉണ്ടാക്കി റിപ്പോർട്ട് തയ്യാറാക്കിയതാണെന്നും ഹിൻഡെൻബർഗിനെ അദാനി ഗ്രൂപ്പ് വിമർശിച്ചു.നേരത്തെ ആരോപിച്ച കാര്യങ്ങൾ തന്നെയാണ് പുതിയ റിപ്പോര്‍ട്ടിലും ഹിൻഡെൻബർഗ് പുറത്തുവിട്ടത്. ഇത് അടിസ്ഥാനരഹിതമെന്ന് സുപ്രീം കോടതി തന്നെ കണ്ടെത്തി തള്ളിക്കളഞ്ഞതാണെന്നും പ്രസ്താവനയിലൂടെ വ്യക്തമാക്കി.
ഹിൻഡെൻബെർഗിന്റെ റിപ്പോർട്ട് ഇന്ത്യൻ നിയമങ്ങളെ പൂർണ്ണമായും അവഹേളിക്കുന്നതും വസ്തുതകളെ അവഗണിച്ച് വ്യക്തിഗത ലാഭത്തിനായി നേരത്തെ നിശ്ചയിച്ച നിഗമനങ്ങളോടെ തയ്യാറാക്കിയതാണെന്നും പ്രസ്താവനയിൽ ആരോപിക്കുന്നു. അദാനി ഗ്രൂപ്പ് കമ്പനികളില്‍ വിദേശത്തുനിന്ന് വന്‍തോതിലുള്ള നിക്ഷേപത്തിന് ഉപയോഗിച്ച മൗറീഷ്യസിലും ബെര്‍മുഡയിലുമുള്ള വിദേശനിക്ഷേപകസ്ഥാപനങ്ങളില്‍ സെബി ചെയർപേഴ്സൺ മാധബി പുരി ബുച്ചിനും ഭര്‍ത്താവ് ധവാല്‍ ബുച്ചിനും നിക്ഷേപമുണ്ടായിരുന്നുവെന്നാണ് ഹിൻഡെൻബർഗിന്റെ റിപ്പോർട്ട്.അദാനിയുടെ ജ്യേഷ്ഠന്‍ വിനോദ് അദാനിയാണ് ഇത് കൈകാര്യം ചെയ്തിരുന്നതെന്നും ഹിന്‍ഡന്‍ബര്‍ഗ് പറയുന്നു.
2023 ജനുവരി 24ന് ഗ്രൂപ്പിനു നേരേ ഉന്നയിച്ച ആരോപണങ്ങള്‍ അദാനി നിഷേധിച്ചിരുന്നു. ഈ ഹിന്‍ഡന്‍ബര്‍ഗ് ആരോപണങ്ങള്‍ സുപ്രീംകോടതി തള്ളിക്കളഞ്ഞിരുന്നു. ഇതേക്കുറിച്ച് അന്വേഷണം നടത്തിയ സെബിയ്‌ക്ക് അദാനിയ്‌ക്കെതിരെ കാര്യമായ തെളിവുകള്‍ ഒന്നും കണ്ടെത്താനായില്ല. ഇതേ തടര്‍ന്ന് ഹിന്‍ഡെന്‍ബെര്‍ഗിനു കാരണം കാണിക്കല്‍ നോട്ടീസ് നല്‍കുകയായിരുന്നു
