കല്പ്പറ്റ: പ്രധാനമന്ത്രിയുടെ വയനാട് സന്ദര്ശനം കേരളത്തിന് ഏറ്റവും ഫലപ്രദമായെന്ന് ബിജെപി സംസ്ഥാന അദ്ധ്യക്ഷന് കെ. സുരേന്ദ്രന്. ഇതിനുമുമ്പ് ഒരു പ്രധാനമന്ത്രിയും ശ്രമിക്കാത്ത തരത്തില് അദ്ദേഹം കാര്യങ്ങള് നേരിട്ട് മനസ്സിലാക്കി.
ഏറെ സമയമെടുത്ത് ദുരന്തത്തിന്റെ വ്യാപ്തി പഠിക്കാന് അദ്ദേഹം ശ്രമിച്ചു. ഈ ദുരന്തത്തില് നിന്നും വയനാടിന് മോചിതമാവാനുള്ള എല്ലാവിധ പിന്തുണയും നരേന്ദ്രമോദി തന്റെ സന്ദര്ശനത്തിലൂടെ നല്കി. പണം ഒന്നിനും ഒരു തടസ്സമാവില്ലെന്ന അദ്ദേഹത്തിന്റെ വാക്കുകള് കേരളത്തിന് ഏറെ പ്രതീക്ഷ പകരുന്നതാണ്. കാര്യങ്ങള് കൂടുതല് പഠിച്ച് വിശദമായ മെമ്മോറാണ്ടം സമര്പ്പിക്കാന് അദ്ദേഹം സംസ്ഥാനത്തിനോട് ആവശ്യപ്പെട്ടിരിക്കുകയാണ്.
കേന്ദ്രവും കേരളവും ഒന്നിച്ചു നിന്നാവും വയനാടിന്റെ പുനരധിവാസം സാധ്യമാക്കുക എന്ന സന്ദേശമാണ് അദ്ദേഹം നല്കിയത്. മലയാളികളെ ഹൃദയത്തില് ചേര്ത്തു പിടിക്കാന് പ്രധാനമന്ത്രിക്ക് സാധിച്ചു. പല ദുരന്തമുഖങ്ങളിലും പുനരധിവാസ പ്രവര്ത്തനങ്ങള്ക്ക് നേതൃത്വം നല്കിയ ഭരണാധികാരി എന്ന നിലയ്ക്ക് കേരളത്തിന്റെ വേദനകള് മോദിക്ക് മനസ്സിലാകും. മുഴുവന് മലയാളികള്ക്കും വേണ്ടിയുള്ള നന്ദി പ്രധാനമന്ത്രിയെ അറിയിക്കുന്നു.
സംസ്ഥാന സര്ക്കാര് പഴയതുപോലെ ഒഴുക്കന് മട്ടില് കാര്യങ്ങള് എടുക്കാതെ നന്നായി ഗൃഹപാഠം ചെയ്തു കൃത്യമായി പഠിച്ച് കേന്ദ്രത്തെ സമീപിക്കണമെന്നും കെ. സുരേന്ദ്രന് പറഞ്ഞു.
