വയനാട് : ഉരുള്‍പ്പൊട്ടലിനെ ദേശീയ ദുരന്തമായി കണ്ട് പ്രത്യേക പാക്കേജ് അനുവദിക്കണമെന്ന് മുഖ്യമന്ത്രി പിണറായി വിജയന്‍ പ്രധാനമന്ത്രിയോട് ആവശ്യപ്പെട്ടെന്ന് മന്ത്രിസഭാ ഉപസമിതി. അഞ്ചു പേര്‍ അടങ്ങുന്ന വിദഗ്ധ സംഘം ചൂരല്‍മല, മുണ്ടക്കൈ, പുഞ്ചിരിമട്ടം അടക്കം പ്രദേശങ്ങള്‍ സന്ദര്‍ശിക്കും.
കുട്ടികളുടെ വിദ്യാഭ്യാസ സൗകര്യം ഉറപ്പാക്കുന്നതില്‍ ഊന്നിയാണ് മുഖ്യമന്ത്രി പ്രധാനമന്ത്രി പങ്കെടുത്ത അവലോകന യോഗത്തില്‍ സംസാരിച്ചത്.മന്ത്രിമാരുടെ സംഘം വയനാട്ടില്‍ ദുരിതബാധിത പ്രദേശത്ത് തുടരുകയാണ്.
തെരച്ചില്‍, കെട്ടിടാവശിഷ്ടം നീക്കല്‍, ക്യാമ്പുകള്‍ തുടരാനുള്ള സഹായം എന്നിവ മുഖ്യമന്ത്രി പ്രധാനമന്ത്രിയോട് തേടി.പുനര്‍നിര്‍മ്മാണം, തൊഴില്‍, വിദ്യാഭ്യാസം എന്നിവയില്‍ സഹായം നല്‍കുന്നത് പരിഗണിക്കാമെന്ന് പ്രധാനമന്ത്രി അറിയിച്ചു.
ഉരുള്‍പ്പൊട്ടലിലെ നാശനഷ്ടങ്ങളില്‍ കൂടുതല്‍ കൃത്യമായ കണക്കുകള്‍ ഉള്‍പെടുത്തി പ്രധാനമന്ത്രിക്ക് മെമ്മോറാണ്ടം നല്‍കും.ഞായറാഴ്ച ജനകീയ തെരച്ചില്‍ നടത്തും. മറ്റ് തിരച്ചിലും ഉണ്ടാകും. തിങ്കളാഴ്ച ഡൗണ്‍സ്ട്രീം കേന്ദ്രീകരിച്ച് പൂര്‍ണ തിരച്ചിലുണ്ടാകുമെന്നും മന്ത്രിസഭാ ഉപസമിതി അറിയിച്ചു.
