ന്യൂദൽഹി: വഖഫ് ബോർഡ് നിയമത്തിൽ ഭേദഗതി വരുത്തി കേന്ദ്രസർക്കാർ ആരെയും ലക്ഷ്യം വയ്‌ക്കുന്നില്ലെന്നും പ്രതിപക്ഷ പാർട്ടികൾ വെറും മോശം അന്തരീക്ഷം സൃഷ്ടിക്കാനാണ് ശ്രമിക്കുന്നതെന്ന് കേന്ദ്രമന്ത്രി പ്രഹ്ലാദ് ജോഷി.
തങ്ങൾ ആരെയും ലക്ഷ്യമിടുന്നില്ല. പ്രതിപക്ഷം ഒരു മോശം അന്തരീക്ഷം സൃഷ്ടിക്കാൻ ആഗ്രഹിക്കുന്നു. നമ്മുടെ മന്ത്രി ബിൽ അവതരിപ്പിക്കുമ്പോൾ വിശദമായി വിശദീകരിക്കും. സമൂഹത്തിലെ ചിലരെ തെറ്റിദ്ധരിപ്പിക്കാൻ അവർ ആഗ്രഹിക്കുന്നു. ഇന്ത്യയുടെ പ്രതിച്ഛായ തകർക്കാനാണ് അവർ ശ്രമിക്കുന്നത്. ലോകത്തിലെ ഏറ്റവും മികച്ച ജനാധിപത്യ രാജ്യങ്ങളിലൊന്നാണ് തങ്ങളെന്നും പ്രഹ്ലാദ് ജോഷി പറഞ്ഞു.
പാർലമെൻ്ററി കാര്യ മന്ത്രി കിരൺ റിജിജു വ്യാഴാഴ്ച ലോക്‌സഭയിൽ വഖഫ് ഭേദഗതി ബിൽ 2024 അവതരിപ്പിച്ചു. വഖഫ് ബോർഡ് നിയമത്തിൽ ഇന്ന് രാവിലെ അവതരിപ്പിച്ച ഭേദഗതികളെ ബിജെപി നേതാക്കൾ പിന്തുണച്ചു. വഖഫ് ബോർഡ് സംവിധാനത്തിന്റെ പേരിൽ നടക്കുന്ന പീഡനങ്ങൾക്ക് പരിഹാരം കാണാനാണ് ഈ ബില്ലെന്ന് മുൻ കേന്ദ്രമന്ത്രിയും ബിജെപി നേതാവുമായ മുഖ്താർ അബ്ബാസ് നഖ്‌വി പറഞ്ഞു.
ഇത് കാലഘട്ടത്തിന്റെ ആവശ്യമാണ്. ഭരണഘടനയുടെ ചട്ടക്കൂടിനുള്ളിൽ, ഈ ബിൽ കൊണ്ടുവരുന്നത് വികസനത്തിന്റെ പാതയെ ശക്തിപ്പെടുത്തും. അതിനെക്കുറിച്ച് ശരിയായ ചർച്ച നടക്കണം, പക്ഷേ നിങ്ങൾക്ക് ഇത് തടയാൻ കഴിയില്ല, തെറ്റിദ്ധരിപ്പിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
ഈ ബിൽ മുസ്ലീം സമുദായത്തിന്റെ ദീർഘകാലമായുള്ള ആവശ്യമാണെന്ന് ബിജെപി വക്താവ് ഷെഹ്സാദ് പൂനവല്ല അവകാശപ്പെട്ടു. അഖിലേഷ് യാദവിന്റെ ട്വീറ്റും കോൺഗ്രസിന്റെയും ഇൻഡി സഖ്യത്തിന്റെയും പ്രതികരണങ്ങളും താൻ കണ്ടു. മുസ്ലീം സമുദായത്തിന്റെ ദീർഘകാലമായുള്ള ആവശ്യമാണ് ഈ ഭേദഗതി.
ഭൂമി കൈവശം വയ്‌ക്കുന്നതിൽ റെയിൽവേയും പ്രതിരോധവും കഴിഞ്ഞാൽ മൂന്നാം സ്ഥാനത്താണ് വഖഫ്. ഈ നിയമഭേദഗതിയെ അഖിലേഷ് യാദവും കോൺഗ്രസും എതിർക്കുമ്പോൾ, ഈ ഭൂമി അനധികൃതമായി കൈയേറിയവർക്കൊപ്പമാണ് അവർ നിൽക്കുന്നതെന്നും അദ്ദേഹം പറഞ്ഞു.
