തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സംഭാവനകള് ഫലപ്രദമായി കൈകാര്യം ചെയ്യുന്നതിന് ധനവകുപ്പില് ഉദ്യോഗസ്ഥര്ക്ക് പ്രത്യേക ചുമതല നല്കി സംവിധാനം ഒരുക്കും. ദുരിതാശ്വാസ നിധിയുടെ പോര്ട്ടലിലും സോഷ്യല് മീഡിയ വഴിയും വിവിധ അക്കൗണ്ടുകളുടെ യുപിഐ ക്യുആര് കോഡ് നല്കിയിരുന്നു. അത് ദുരുപയോഗപ്പെടാനുള്ള സാധ്യത ശ്രദ്ധയില്പ്പെട്ടതിനെ തുടര്ന്ന് ക്യുആര് കോഡ് സംവിധാനം പിന്വലിക്കാന് തീരുമാനിച്ചിട്ടുണ്ട്. പകരം പോര്ട്ടലില് നല്കിയിട്ടുള്ള യുപിഐ ഐഡി വഴി ഗൂഗിള് പേയിലൂടെ സംഭാവന നല്കാം.
സംഭാവന ചെയ്യുന്നതിനായി donation.cmdrf.kerala.gov.in എന്ന പോര്ട്ടലില് ദുരിതാശ്വാസ നിധിയിലുള്ള വിവിധ ബാങ്കുകളുടെ എല്ലാ അക്കൗണ്ട് നമ്പറുകളും നല്കിയിട്ടുണ്ട്. പോര്ട്ടലില് നല്കിയിരിക്കുന്ന നേരിട്ടുള്ള പേയ്മെന്റ് സംവിധാനം വഴി വിവരങ്ങള് നല്കി ഓണ്ലൈന് ബാങ്കിങ്/ ഡെബിറ്റ് /ക്രെഡിറ്റ് കാര്ഡുകള്, യുപിഐ എന്നിവ വഴിയോ അക്കൗണ്ട് നമ്പര് വഴി നേരിട്ടോ സംഭാവന നല്കാം. ഇതിലൂടെ നല്കുന്ന സംഭാവനയ്ക്ക് ഉടന് തന്നെ റെസീപ്റ്റ് ഡൗണ്ലോഡ് ചെയ്യാന് സാധിക്കും. യുപിഐ വഴിയുള്ള ഇടപാടുകള്ക്ക് 48 മണിക്കൂറിനുശേഷമേ റസീപ്റ്റ് ലഭിക്കൂ.
