ഏഷ്യാ കപ്പ് വനിതാ ക്രിക്കറ്റ്: ശ്രീലങ്ക ജേതാക്കള്‍

ഡാംബുള്ള: ഏഷ്യാ കപ്പ് വനിതാ ക്രിക്കറ്റ് ഫൈനലില്‍ ശ്രീലങ്ക ജേതാക്കള്‍. ഭാരതത്തെ എട്ട് വിക്കറ്റിന് പരാജയപ്പെടുത്തിയാണ് ശ്രീലങ്ക കന്നിക്കിരീടം സ്വന്തമാക്കിയത്. എട്ട് പന്തു ബാക്കി നില്‍ക്കെ ഭാരതം ഉയര്‍ത്തിയ 166 റണ്‍സ് എന്ന വിജയലക്ഷ്യം ശ്രീലങ്ക മറികടന്നു.

ക്യാപ്റ്റന്‍ ചമരി അട്ടപ്പട്ടു (43 പന്തില്‍ 61), ഹര്‍ഷിദ സമര വിക്രമ (51 പന്തില്‍ 69) എന്നിവരാണ് ലങ്കന്‍ വിജയത്തിന് അടിത്തറ പാകിയത്. നാലാമതായി ക്രീസിലെത്തിയ കവിഷ ദില്‍ഹരിയുടെ (16 പന്തില്‍ 30) മിന്നലാക്രമണം ലങ്കയുടെ വിജയം എളുപ്പമാക്കി. ഹര്‍ഷിദയാണ് കളിയിലെ താരം.

സ്മൃതി മന്ദാനയുടെ (47 പന്തില്‍ 60) ഒറ്റയാള്‍ പോരാട്ടമാണ് ഭാരതത്തിന്റെ ഇന്നിങ്‌സിന് കരുത്തായത്. ജെമീമ റോഡ്രിഗ്‌സും (29) റിച്ചാ ഘോഷും (30) ഭാരതത്തെ ഭേദപ്പെട്ട സ്‌കോറിലേക്ക് നയിച്ചു. ക്യാപ്റ്റന്‍ ഹര്‍മന്‍ പ്രീത് കൗര്‍ (11), ഷഫാലി വര്‍മ (16), ഉമഛേത്രി (9) എന്നിവര്‍ നിറംമങ്ങി.