പാലക്കാട്: മണ്ണാർക്കാട് സ്കൂൾ വാഹനം ഇടിച്ച് വിദ്യാർത്ഥിനിക്ക് ദാരുണാന്ത്യം. യുകെജി വിദ്യാർത്ഥിനി ഹിബയാണ് മരിച്ചത്. ഇതേ വാഹനത്തിൽ വീടിന് മുന്നിലെ സ്റ്റോപ്പിൽ വിദ്യാർത്ഥിനി വന്നിറങ്ങിയപ്പോഴായിരുന്നു സംഭവം. സ്കൂൾ വാഹനത്തിന് മുന്നിലൂടെ റോഡിന്റെ മറുവശം കടക്കവെയാണ് അപകടം ഉണ്ടായത്.
അതേസമയം, കൊല്ലം പോളയത്തോട് ഉണ്ടായ വാഹനാപകടത്തിൽ 8 വയസ്സുകാരൻ മരിച്ചു. ദേവമാത സ്കൂളിലെ മൂന്നാം ക്ലാസ് വിദ്യാർത്ഥി വിശ്വജിത്താണ് മരിച്ചത്. സ്കൂട്ടറിൽ കുടുംബത്തോടോപ്പം സ്കൂളിലേക്ക് പോകുമ്പോഴായിരുന്നു അപകടം. പിതാവ് ഓടിച്ച സ്കൂട്ടറിന്റെ നിയന്ത്രണം നഷ്ടപെട്ട് വിശ്വജിത്ത് നിലത്തുവീണു. കുട്ടിയുടെ തലയിലൂടെ പിന്നിലെത്തിയ ബസ് കയറിയിറങ്ങുകയായിരുന്നു.
