ആരാധകൻ സമ്മാനിച്ച ഷർട്ട് ധരിച്ച് സിനിമ പ്രമോഷനെത്തി സൂപ്പർതാരം മമ്മൂട്ടി. ശാരീരിക പരിമതികൾക്കിടയിൽ മലപ്പുറം സ്വദേശി ജസ്ഫർ കോട്ടക്കുന്ന് എന്ന യുവാവ് സ്വന്തമായി ഡിസൈൻ ചെയ്തെടുത്ത ഷർട്ടാണ് താരം അണിഞ്ഞത്. മസ്കുലാർ ഡിസ്ട്രോഫി എന്ന രോഗം ബാധിച്ച് കഴുത്തിന് താഴെ തളർന്ന ജസ്ഫർ ചുണ്ടുകൾക്കിടയിൽ ബ്രഷ് കടിച്ച് പിടിച്ചാണ് പെയിന്റ് ചെയ്തത്.
വെള്ള ലിനൻ ഷർട്ടിൽ മനോഹരമായ നീല പെയിന്റിങ്ങിലുള്ളതാണ് ഷർട്ട്. ഇടിയൻ ചന്തു എന്ന സിനിമയുടെ പ്രമോഷൻ ചടങ്ങിനാണ് താരം ഈ ഷർട്ട് ധരിച്ചെത്തിയത്. ഒരു മാസം മുൻപ് ദുബായിൽ എത്തിയപ്പോൾ ജസ്ഫർ കോട്ടക്കുന്ന് കുടുംബസമേതം മമ്മൂട്ടിയെ സന്ദർശിച്ചിരുന്നു. മമ്മൂട്ടിയുടെ മനോഹരമായ ഒരു ചിത്രം അദ്ദേഹം വരച്ചു നൽകി. അതിനൊപ്പമാണ് മനോഹരമായ ഷർട്ടും സമ്മാനിച്ചത്. വളരെ സന്തോഷത്തോടെ ഷർട്ട് സ്വീകരിച്ച താരം അത് ധരിക്കുമെന്നും ഉറപ്പു നൽകി.
ഒരു മാസമായിട്ടും താരം ഷർട്ട് ധരിച്ച് കാണാതിരുന്നതോടെ അദ്ദേഹം മറന്നുപോയെന്നാണ് ജസ്ഫർ കരുതിയത്. എന്നാൽ ജസ്ഫറിനെ പോലും ഞെട്ടിച്ചുകൊണ്ട് താരം ഷർട്ട് ധരിച്ച് പൊതുവേദിയിൽ പ്രത്യക്ഷപ്പെടുകയായിരുന്നു. സിനിമയിൽ മമ്മൂട്ടിയ്‌ക്ക് വസ്ത്രം ഡിസൈൻ ചെയ്യുന്നവരുമായി ബന്ധപ്പെട്ട് അളവ് മനസിലാക്കിയാണ് ഷർട്ട് തയാറാക്കിയത്. അതിനാൽ തന്നെ താരത്തിന് കൃത്യം പാകമാവുകയായിരുന്നു.
ജസ്ഫറും ഇതിന്റെ സന്തോഷം സമൂഹ മാധ്യമങ്ങളിലൂടെ പങ്കുവെച്ചിട്ടുണ്ട്. ‘നന്ദി മമ്മൂക്ക… എന്നിലെ കലാകാരന് നൽകിയ ഈ അംഗീകാരത്തിന്… എന്റെ അധ്വാനത്തിന് വില നൽകിയതിന്… പിന്നെ ഒരു മാസം കഴിഞ്ഞിട്ടും എന്നെ ഓർമിച്ചതിന്,’ എന്നാണ് ജസ്ഫർ സമൂഹ മാധ്യമങ്ങളിൽ കുറിച്ചത്.
