വേണോ നമ്മൾ സ്ത്രീകൾക്ക് വിവാഹം? വേണ്ട. ഒരു സ്ത്രീയും അവരുടെ ധനം ആർക്കും നൽകിയിട്ട് വിവാഹം ചെയ്യരുത്. അവർ നിങ്ങളെ ഉപേക്ഷിച്ചു പോയാൽ? ധനം വാങ്ങി അവർ ജീവനെടുപ്പിക്കുമെന്ന് ഭാമ
വിവാഹവുമായി ബന്ധപ്പെട്ട് നടി ഭാമ സോഷ്യൽ മീഡിയയിൽ പങ്കുവച്ച കുറിപ്പ് ഏറെ ശ്രദ്ധ നേടുന്നു. ഒരിക്കലും ഒരു സ്ത്രീ വിവാഹം കഴിക്കരുത് എന്ന് തുടങ്ങുന്നതാണ് ഭാമയുടെ പോസ്റ്റ്. ഇൻസ്റ്റഗ്രാം സ്റ്റോറീസിലാണ് ഭാമ തന്റെ കുറിപ്പ് പങ്കുവച്ചിട്ടുള്ളത്.
വേണോ നമ്മൾ സ്ത്രീകൾക്ക് വിവാഹം? വേണ്ട. ഒരു സ്ത്രീയും അവരുടെ ധനം ആർക്കും നൽകിയിട്ട് വിവാഹം ചെയ്യരുത്. അവർ നിങ്ങളെ ഉപേക്ഷിച്ചു പോയാൽ? ധനം വാങ്ങി അവർ ജീവനെടുപ്പിക്കും, ഒരിക്കലും ഒരു സ്ത്രീ വിവാഹം കഴിക്കരുത്. വരുന്നവർ എങ്ങനെയാണ് ട്രീറ്റ് ചെയ്യുക എന്നുപോലും അറിയാതെ. ജീവനെടുക്കാൻ സാധ്യതയുള്ള സ്ഥലത്തു നിന്നും എത്രയും വേഗം…’, ഭാമ കുറിച്ചത്. സ്ത്രീധനത്തെക്കുറിച്ചും ഭർതൃ വീട്ടിൽ നേരിടുന്ന പ്രശ്നങ്ങളെക്കുറിച്ചുമുള്ള വാക്കുകളാണിത്.
2020ൽ വിവാഹിതയായ ഭാമയുടെ വേർപിരിയൽ സംബന്ധിച്ചുള്ള അഭ്യൂഹങ്ങൾ നിലനിൽക്കുമ്പോഴാണ് ഇത്തരത്തിലൊരു കുറിപ്പ് താരം പങ്കുവെച്ചിരിക്കുന്നത്. ഭർത്താവിനൊപ്പമുള്ള ചിത്രങ്ങളും മറ്റും സോഷ്യൽ മീഡിയയിൽ നിന്നും ഒഴിവാക്കിയതും ഏറെ ചർച്ചാവിഷയമായിരുന്നു. പിന്നീട് മകളുമൊത്തുള്ള ചിത്രങ്ങളാണ് അധികവും പങ്കുവെയ്‌ക്കാറുള്ളത്. സിംഗിൾ മദറാകുന്നതിനെക്കുറിച്ചും, അത് തനിക്കു നൽകിയ ഊർജ്ജത്തെക്കുറിച്ചുമുള്ള കുറിപ്പ് ഇതിനു മുമ്പ് ഒരു ചിത്രത്തിനൊപ്പം താരം ചേർത്തിരുന്നു.
എന്നാൽ വേർപിരിയൽ വാർത്തകളോട് താരവും ഭർത്താവ് അരുണും ഇതുവരെ പ്രതികരിച്ചിട്ടില്ല. വിവാഹത്തിനു ശേഷം അഭിനയ ജീവതത്തിൽ നിന്നും മാറി നിന്ന ഭാമ മകൾ ജനിച്ചതിനു ശേഷമാണ് സോഷ്യൽ മീഡിയയിൽ ആക്ടീവായി തുടങ്ങിയത്. അടുത്തിടെ നടന്ന താര വിവാഹങ്ങൾക്കും മറ്റും ഭാമ തനിയെയാണ് എത്തിയത്.
ലേഹിതദാസ് സംവിധാനം ചെയ്ത ‘നിവേദ്യ’മാണ് ഭാമയുടെ ആദ്യ ചിത്രം. അഭിനയത്തിൽ നിന്നും ഇടവേള എടുത്തുവെങ്കിലും ‘വാസുകി’ എന്ന വസ്ത്ര ബ്രാൻഡിന് ഉടമയാണ് താരം.
