ന്യൂദല്ഹി: ഗുരുവായൂര് ദേവസ്വത്തില് ജോലി ചെയ്യുന്ന താല്കാലിക ജീവനക്കാരെ സ്ഥിരപ്പെടുത്തണമെന്നാവശ്യപ്പെട്ടുള്ള ഹര്ജി സുപ്രീംകോടതി തള്ളി. ദേവസ്വത്തില് നിലവിലുള്ള ഒഴിവുകളിലേക്ക് നിയമനം നടത്താന് ദേവസ്വം റിക്രൂട്ട്മെന്റ് ബോര്ഡിന് സുപ്രീംകോടതി അനുമതിയും നല്കി. നിലവിലെ താല്കാലിക ജീവനക്കാര്ക്ക് പുതിയ നിയമന നടപടികളില് പങ്കെടുക്കാമെന്നും ജസ്റ്റിസുമാരായ ജെ. കെ. മഹേശ്വരി, രാജേഷ് ബിന്ഡാല് എന്നിവരുള്പ്പെട്ട സുപ്രീംകോടതി ബെഞ്ച് വ്യക്തമാക്കി.
ദീര്ഘനാളായി ദേവസ്വത്തില് ജോലി ചെയ്യുന്ന താല്കാലിക ജീവനക്കാര്ക്ക് പുതിയ നിയമന പ്രക്രിയയില് പ്രായം ഇളവ് നല്കണമെന്ന് സുപ്രീംകോടതി നിര്ദേശിച്ചത് ജീവനക്കാര്ക്ക് ആശ്വാസമായി. അതിന് പുറമേ ഈ ജീവനക്കാരുടെ പ്രവൃത്തി പരിചയവും റിക്രൂട്ട്മെന്റ് ബോര്ഡ് കണിക്കിലെടുക്കണം.
താല്കാലിക ജീവനക്കാരെ സ്ഥിരപ്പെടുത്തണമെന്ന ആവശ്യവുമായി 242 ജീവനക്കാരാണ് സുപ്രീം കോടതിയെ സമീപിച്ചത്. അഭിഭാഷകരായ കൈലാസനാഥപിള്ള, ആര്. ബസന്ത്, വി. ഗിരി തുടങ്ങിയവര് താല്ക്കാലിക ജീവനക്കാര്ക്ക് വേണ്ടി ഹാജരായി.
