ആലപ്പുഴ: താമരക്കുളം വൈയ്യാങ്കരയിൽ രോഗിയുമായി പോയ ആംബുലൻസിന് മുന്നിൽ കാർ കുറുകെയിട്ട് യുവാക്കളുടെ വെല്ലുവിളി. ഡ്രൈവറെ കയ്യേറ്റം ചെയ്യാനും ശ്രമം നടന്നു. ശൂരനാട് സ്വദേശികളായ സംഘമാണ് കാറിലുണ്ടായിരുന്നതെന്നാണ് വിവരം. സംഭവത്തിന്റെ ദൃശ്യങ്ങള് പുറത്തുവന്നിട്ടുണ്ട്.
വ്യാഴാഴ്ച ഉച്ചയോടെ ആനയടിയിൽ നിന്ന് സ്ട്രോക്ക് വന്ന രോഗിയുമായി വണ്ടാനം മെഡിക്കൽ കോളെജ് ആശുപത്രിയിലേക്ക് പോകുന്നതിനിടെയാണ് സംഭവം. സൈഡ് നല്കാതെ കുറച്ചധികം ദൂരം യുവാക്കള് ആംബുലന്സിന് മുന്നില് വാഹനം ഓടിച്ചു. ആംബുലന്സ് ഡ്രൈവര് നിരന്തരം ഹോണ് മുഴക്കി സൈഡ് ആവശ്യപ്പെട്ടെങ്കിലും യുവാക്കള് ഒഴിഞ്ഞുമാറാന് തയ്യാറായില്ല. പിന്നീട് വാഹനം നടുറോഡില് നിര്ത്തി ആംബുലന്സ് തടഞ്ഞ് ഡ്രൈവറുമായി വാക്കേറ്റത്തിലേര്പ്പെടുകയായിരുന്നു.
രോഗിയെ ആശുപത്രിയിലെത്തിച്ച ശേഷം തിരികെയെത്തി ഡ്രൈവര് നൂറനാട് പോലീസില് പരാതി നല്കുകയായിരുന്നു. അതേസമയം, പരാതി ഒത്തുതീര്പ്പാക്കാന് ശ്രമിക്കുന്നുവെന്ന് ആരോപണമുണ്ട്. എന്നാല്, പരാതിയുമായി മുന്നോട്ടുപോകാനാണ് ആംബുലന്സ് ഡ്രൈവര്മാരുടെ സംഘടനയുടെ തീരുമാനം.
