ന്യൂദല്ഹി: അഖിലേന്ത്യാ മെഡിക്കല് പ്രവേശനത്തിനുള്ള (നീറ്റ് യുജി, പിജി) കൗണ്സലിങ് തീയതി പ്രഖ്യാപിച്ചിട്ടില്ലെന്ന് കേന്ദ്രം. ഡയറക്ടറേറ്റ് ജനറല് ഓഫ് ഹെല്ത്ത് സര്വീസസിന് കീഴിലുള്ള മെഡിക്കല് കൗണ്സലിങ് കമ്മിറ്റിയാണ് ഷെഡ്യൂള് പ്രഖ്യാപിക്കേണ്ടത്.
2024 ലെ നീറ്റ് യുജി, പിജി കോഴ്സുകളുടെ കൗണ്സലിങ് ഷെഡ്യൂള്, കമ്മിറ്റി ഇതുവരെ പ്രഖ്യാപിച്ചിട്ടില്ല. ഇതിനുള്ള നടപടിക്രമങ്ങള് പുരോഗമിക്കുകയാണെന്നും കേന്ദ്ര ആരോഗ്യമന്ത്രാലയം അറിയിച്ചു. നീറ്റ് യുജി കൗണ്സലിഗ് മാറ്റിവച്ചെന്ന രീതിയില് ഇന്നലെ വാര്ത്തകള് പുറത്തുവന്നിരുന്നു. ഇതിനു പിന്നാലെയാണ് മന്ത്രാലയത്തിന്റെ വിശദീകരണം.
നീറ്റ് യുജി പരീക്ഷ സംബന്ധിച്ച ഹര്ജികള് നിലവില് സുപ്രീംകോടതിയുടെ പരിഗണനയിലാണ്. ഈ ഹര്ജികള് എട്ടിന് പരിഗണിക്കുമെന്നാണ് സുപ്രീംകോടതി അറിയിച്ചിരിക്കുന്നത്. നീറ്റ് യുജി പരീക്ഷ റദ്ദാക്കുന്നത് ലക്ഷക്കണക്കിന് വിദ്യാര്ത്ഥികളുടെ ഭാവിയെ പ്രതികൂലമായി ബാധിക്കുമെന്ന് കേന്ദ്ര വിദ്യാഭ്യാസ മന്ത്രാലയവും നാഷണല് ടെസ്റ്റിങ് ഏജന്സിയും കഴിഞ്ഞദിവസം സുപ്രീംകോടതിയില് നല്കിയ സത്യവാങ്മൂലത്തില് വ്യക്തമാക്കിയിരുന്നു.
പരീക്ഷയുടെ രഹസ്യ സ്വഭാവത്തെ നിലവിലെ കാര്യങ്ങള് ബാധിച്ചിട്ടില്ല. ഒറ്റപ്പെട്ട സംഭവങ്ങളുടെ പേരില് പരീക്ഷ റദ്ദാക്കരുത്. പരീക്ഷാ ക്രമക്കേടുമായി ബന്ധപ്പെട്ട ആരോപണങ്ങളില് സിബിഐ അന്വേഷണം പുരോഗമിക്കുകയാണെന്നും കേന്ദ്രം സുപ്രീംകോടതിയെ അറിയിച്ചിട്ടുണ്ട്.
