കൊച്ചി: ഇടുക്കിയില്‍ ഭൂസംരക്ഷണ സേന (എല്‍പിഎഫ്) അംഗങ്ങളെ പുനര്‍വിന്യസിക്കാനുള്ള തീരുമാനം മരവിപ്പിക്കണമെന്ന് ജില്ലാ കളക്ടര്‍ക്ക് ഹൈക്കോടതി നിര്‍ദേശം.
മൂന്നാറിലെ കൈയേറ്റം ഒഴിപ്പിക്കുന്നതുമായി ബന്ധപ്പെട്ട ഹര്‍ജികള്‍ പരിഗണിക്കവെയാണ് ജസ്റ്റിസ് എ. മുഹമ്മദ് മുസ്താഖും ജസ്റ്റിസ് എസ്. മനുവും ഈ നിര്‍ദേശം നല്‍കിയത്. ഇടുക്കിയിലെ ദേവികുളം, ഉടുമ്പന്‍ചോല, പീരുമേട് താലൂക്കുകളിലെ എല്‍പിഎഫ് അംഗങ്ങളുടെ സ്ഥലംമാറ്റം സംബന്ധിച്ച് അമിക്കസ് ക്യൂറി ഹരീഷ് വാസുദേവന്‍ ചൊവ്വാഴ്ച ബെഞ്ചിനെ അറിയിച്ചിരുന്നു. പ്രദേശത്തിന്റെ ഭൂപ്രദേശവുമായി പരിചയമുള്ള അംഗങ്ങളെ കൈമാറുന്നത് നടപടികളെ പ്രതികൂലമായി ബാധിക്കുമെന്ന് അദ്ദേഹം ചൂണ്ടിക്കാട്ടി. തുടര്‍ന്നാണ് ഹൈക്കോടതിയുടെ ഉത്തരവ്.
അതിനിടെ, പഞ്ചായത്തില്‍ കെട്ടിടം പണിയുന്നതിന് റവന്യൂ ഉദ്യോഗസ്ഥരുടെ നോ ഒബ്ജക്ഷന്‍ സര്‍ട്ടിഫിക്കറ്റ് (എന്‍ഒസി) ആവശ്യമില്ലെന്ന് കാണിച്ച് ജില്ലാ കളക്ടര്‍ പള്ളിവാസല്‍ ഗ്രാമപഞ്ചായത്ത് സെക്രട്ടറിക്ക് കത്ത് നല്‍കിയെന്ന ആരോപണത്തിന് മറുപടിയായി ഇടുക്കി ജില്ലാ ഭരണകൂടം ഇതു സംബന്ധിച്ച ഫയലുകള്‍ സമര്‍പ്പിച്ചു.
പ്രതികരിക്കാൻ ഇവിടെ എഴുതുക: