വാരിപ്പുണര്‍ന്ന് അവസാനനിമിഷം വരെ; മലവെള്ളപ്പാച്ചിലില്‍ ഒരു കുടുംബത്തിലെ അഞ്ച് പേര്‍ക്ക് ദാരുണാന്ത്യം (വീഡിയോ)

മുംബൈ: മഹാരാഷ്‌ട്രയിലെ പൂനെ ലോണാവാലയില്‍ മലവെള്ളപ്പാച്ചിലില്‍പ്പെട്ട് ഒരു കുടുംബത്തിലെ അഞ്ചുപേര്‍ മരിച്ചു. ഇന്നലെ വൈകിട്ടോടെ, കാണാതായ നാലുവയസുകാരന്റെ മൃതദേഹം കൂടി കണ്ടെടുത്തതോടെ രക്ഷാപ്രവര്‍ത്തനം അവസാനിപ്പിച്ചു. ലോണാവാല ബുഷി ഡാമിന് സമീപത്തെ വെള്ളച്ചാട്ടത്തില്‍ ഞായറാഴ്ച ഉച്ചയോടെയാണ് അപകടമുണ്ടായത്.

VIDEO | Visuals of five persons who drowned in a waterfall close to the backwater of Bhushi Dam in Pune's Lonavala area earlier today.

Officials said that the incident happened at 12:30pm when a family was out for a picnic at the scenic spot. They said the bodies of Shahista… pic.twitter.com/qOmk0qQHPa

— Press Trust of India (@PTI_News) June 30, 2024

വെള്ളച്ചാട്ടത്തിലിറങ്ങിയ കുടുംബം അപ്രതീക്ഷിതമായുണ്ടായ മലവെള്ളപ്പാച്ചിലില്‍പ്പെടുകയായിരുന്നു. പൂനെ സയിദ് നഗറിലെ ഷാഹിസ്ത ലിയാഖത്ത് അന്‍സാരി (36), അമിമ ആദില്‍ അന്‍സാരി(13), ഉമേറ ആദില്‍ അന്‍സാരി (എട്ട്), മറിയ സെയിന്‍ (ഒന്‍പത്), നാലുവയസുകാരനായ അദ്നാന്‍ അന്‍സാരി എന്നിവരാണ് മരിച്ചത്. ഇവരില്‍ മൂന്ന് പേരുടെ മൃതദേഹം ഞായറാഴ്ച കണ്ടെത്തി. ഇന്നലെ നടത്തിയ തെരച്ചിലില്‍ രാവിലെ മറിയയുടെ മൃതദേഹം കണ്ടെത്തി.

വൈകിട്ടോടെയാണ് അദ്‌നാന്റെ മൃതദേഹം കണ്ടെത്തിയത്.
പൂനെ സയിദ്നഗറിലെ അന്‍സാരി കുടുംബത്തിലെ അംഗങ്ങളാണ് ബുഷി ഡാമിലെ വെള്ളച്ചാട്ടത്തില്‍ അപകടത്തില്‍പ്പെട്ടത്. ഇവരില്‍ അഞ്ച് പേര്‍ രക്ഷപ്പെട്ടു. 17 പേരടങ്ങുന്ന സംഘം സയിദ്നഗറില്‍നിന്ന് ബസിലാണ് ബുഷി ഡാമിലെത്തിയത്. തുടര്‍ന്ന് സമീപത്തെ വെള്ളച്ചാട്ടം കാണാനായി പോയി. സംഘത്തിലെ ചിലര്‍ വെള്ളച്ചാട്ടത്തിലിറങ്ങി. ഇതിനിടെയാണ് മലവെള്ളപ്പാച്ചിലുണ്ടായത്.

അപ്രതീക്ഷിതമായി വെള്ളം ഇരച്ചെത്തിയതോടെ കുടുംബം ഒരു പാറയ്‌ക്ക് മുകളില്‍ കുടുങ്ങിപ്പോയി. ഒഴുകിപ്പോകാതിരിക്കാനായി ഇവര്‍ പരസ്പരം കൈകള്‍ ചേര്‍ത്തുപിടിച്ച് നിന്നെങ്കിലും രക്ഷപ്പെടാനായില്ല. ഇതിനിടെ സമീപത്തുണ്ടായിരുന്ന ബന്ധുക്കള്‍ സഹായത്തിനായി അലറിവിളിക്കുന്നതും പരസ്പരം കൈകള്‍ ചേര്‍ത്തുപിടിച്ച് നില്‍ക്കാന്‍ ആവശ്യപ്പെടുന്നതും കഴിഞ്ഞദിവസം പുറത്തുവന്ന വീഡിയോ ദൃശ്യങ്ങളിലുണ്ടായിരുന്നു. രക്ഷപ്പെടുത്താന്‍ കരയിലുള്ളവര്‍ ശ്രമം തുടരവെയാണ് കുതിച്ചെത്തിയ വെള്ളം കുടുംബത്തെ ഒഴുക്കിക്കൊണ്ടുപോയത്.