ഇന്ഡോര്: യുവമോര്ച്ചാ നേതാവും മധ്യപ്രദേശ് മന്ത്രി കൈലാഷ് വിജയവര്ഗിയയുടെ സഹായിയുമായ മോനു കല്യാണ് ഇന്നലെ പുലര്ച്ചെ ഇന്ഡോറില് വെടിയേറ്റ് മരിച്ചു. യുവമോര്ച്ച സിറ്റി വൈസ് പ്രസിഡന്റായിട്ടുള്ള ഇദ്ദേഹത്തെ മുന് വൈരാഗ്യത്തെത്തുടര്ന്ന് പിയൂഷ്, അര്ജൂന് എന്നിവര് ചേര്ന്ന് വധിക്കുകയായിരുന്നുവെന്ന് പോലീസ് പറഞ്ഞു. ബൈക്കിലെത്തി കൊല നടത്തിയ ഇവര് കല്യാണിന്റെ അയല്വാസികളാണ്. പ്രതികള് ഒളിവിലാണ്.
നഗരത്തിലെ ചിമന്ബാഗ് ഏരിയയില് ബിജെപി വാഹന റാലിക്കായി ബാനറുകളും പോസ്റ്ററുകളും പതിക്കുന്നതിനിടെ ബൈക്കിലെത്തിയ രണ്ടുപേര് കല്യാണിനെ സമീപിച്ചതായി ദൃക്സാക്ഷികള് പറയുന്നതു. ഇരുവരും ഫോണ് നമ്പര് ചോദിച്ചു. കല്യാണ് തന്റെ മൊബൈല് ഫോണ് എടുക്കുന്നതിനിടയില് അവരില് ഒരാള് പിസ്റ്റള് ഉപയോഗിച്ച് നെഞ്ചില് വെടിവയ്ക്കുകയായിരുന്നു. തുടര്ന്ന് ഇവര് രക്ഷപ്പെടുകയായിരുന്നു. സുഹൃത്തുക്കള് ചേര്ന്ന് കല്യാണിനെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
