ട്രിനിഡാഡ്: ട്വന്റി 20 ക്രിക്കറ്റ് ലോകകപ്പില് സൂപ്പര് എട്ട് കാണാതെ പുറത്തായ ന്യൂസിലന്ഡിന് ആശ്വാസ വിജയം. ക്രിക്കറ്റിലെ കുഞ്ഞന്മാരായ ഉഗാണ്ടയെ ഒന്പത് വിക്കറ്റിന് തോല്പ്പിച്ചു. ആദ്യം ബാറ്റ് ചെയ്ത ഉഗാണ്ടയെ വെറും 40 റണ്സിന് പുറത്താക്കിയപ്പോള് മറുപടി ബാറ്റിങ്ങില് 5.2 ഓവറില് ഒരു വിക്കറ്റ് നഷ്ടത്തില് 41 റണ്സെടുത്ത് ലക്ഷ്യം മറികടന്നു.
സ്കോര്: ഉഗാണ്ട- 40 (18.4), ന്യൂസിലന്ഡ്- 41/1 (5.2).
നാല് ഓവറില് നാല് റണ്സ് മാത്രം വിട്ടുകൊടുത്ത് മൂന്ന് വിക്കറ്റ് പിഴുത പേസര് ടിം സൗത്തിയാണ് ന്യൂസിലന്ഡിന്റെ വിജയശില്പി. നാലോവറില് ഏഴ് റണ്ണിന് രണ്ട് വിക്കറ്റുമായി പേസര് ട്രെന്ഡ് ബോള്ട്ടും 3.4 ഓവറില് എട്ട് റണ്സിന് രണ്ട് വിക്കറ്റുമായി സ്പിന്നര് മിച്ചല് സാന്റ്നറും മൂന്നോവറില് ഒന്പത് റണ്സിന് രണ്ട് വിക്കറ്റുമായി സ്പിന്നര് രചിന് രവീന്ദ്രയും ഒന്പത് റണ്ണിന് ഒരു വിക്കറ്റുമായി പേസര് ലോക്കീ ഫെര്ഗ്യൂസനും തിളങ്ങി. ഉഗാണ്ടന് നിരയില് 18 പന്തില് 11 റണ്സെടുത്ത കെന്നെത്ത് വൈസ്വ മാത്രമാണ് രണ്ടക്കം കണ്ടത്. നാല് പേര് പൂജ്യരായി മടങ്ങി.
മറുപടി ബാറ്റിങ്ങില് ന്യൂസിലന്ഡ് 5.2 ഓവറില് ജയത്തിലെത്തി. 17 പന്തില് 9 റണ്സെടുത്ത ഫിന് അലനെ റിയാസത്ത് അലി ഷാ പറഞ്ഞയച്ചു. ഡേവോണ് കോണ്വെ 15 പന്തില് 22 ഉം, രചിന് രവീന്ദ്ര 1 പന്തില് 1 റണ്ണുമായി പുറത്താവാതെ നിന്നു.
ഈ ലോകകപ്പില് ന്യൂസിലന്ഡിന്െ ആദ്യ ജയമാണിത്. കിവികള് ഉള്പ്പെട്ട ഗ്രൂപ്പ് സിയില് നിന്ന് ഇതിനകം അഫ്ഗാനിസ്ഥാനും വെസ്റ്റ് ഇന്ഡീസും സൂപ്പര് എട്ടിന് യോഗ്യത നേടിയിട്ടുണ്ട്. അതിനാല് ന്യൂസിലന്ഡിന് ഇന്നത്തെ ജയം കൊണ്ട് ഗുണമില്ല. നാളെ അവസാന മത്സരത്തില് പാപ്പുവ ന്യു ഗിനിയയെ ന്യൂസിലാന്ഡ് നേരിടും.
