കൊച്ചി: അസാധാരണവും നൂതനവുമായ കോര്ണിയ മാറ്റല് നടപടിക്രമത്തിലൂടെ യുവ മത്സ്യത്തൊഴിലാളിയുടെ കാഴ്ച വിജയകരമായി സംരക്ഷിച്ചു. ഒന്നര വര്ഷം മുമ്പ് വലത് കണ്ണിലെ ഗുരുതരമായ ഫംഗസ് അണുബാധ ചികിത്സിക്കാനായി ഘടിപ്പിച്ച കോര്ണിയല് ടിഷ്യൂകളുടെ പരാജയം മൂലം കണ്ണില് നിരവധി സങ്കീര്ണതകള് നേരിട്ട കോട്ടയം സ്വദേശി ജിഷ്ണു (29) വിനാണ് കൊച്ചിയിലെ ഡോ. അഗര്വാള്സ് നേത്രാശുപത്രിയിലെ വിദഗ്ദ്ധ ഡോക്ടര്മാരുടെ അപൂര്വ ചികിത്സയിലൂടെ കാഴ്ച്ചശക്തി സംരക്ഷിക്കാനായത്.
കോര്ണിയയുടെ കേടുപാടുകള് ബാധിച്ച പാളികളെ മാത്രം പ്രീ ഡെസെമെറ്റ്സ് എന്ഡോത്തീലിയല് കെരാറ്റോപ്ലാസ്റ്റി (PDEK) എന്നറിയപ്പെടുന്ന സാങ്കേതിക വിദ്യയുടെ സഹായത്തില് നീക്കി നവീനവും ആരോഗ്യവുമുള്ള കോര്ണിയയുടെ ടിഷ്യുകള് സ്ഥാപിച്ചു. പിഡിഇകെ യുടെ സഹായത്താല് പൂര്ണമായ കോര്ണിയ മാറ്റല് ശസ്ത്രക്രിയക്ക് വിധേയമാകാതെ തന്നെ സങ്കീര്ണതകളൊന്നുമില്ലാതെ രോഗി വളരെവേഗം സുഖം പ്രാപിച്ചതായി ശസ്ത്രക്രിയക്ക് നേതൃത്വം നല്കിയ ഡോ. അഗര്വാള്സ് ഐ ഹോസ്പിറ്റലിലെ സീനിയര് കണ്സള്ട്ടന്റ് ഒഫ്താല്മോളജിസ്റ്റുകളായ ഡോ. പി. സഞ്ജന, ഡോ. പ്രീതി നവീന് എന്നിവര് പറഞ്ഞു.
ഒന്നര വര്ഷം മുമ്പ് ജിഷ്ണുവിന്റെ വലത് കണ്ണിന് ഗുരുതരമായ ഫംഗസ് അണുബാധയുണ്ടായിരുന്നതായി ഡോ. പി. സഞ്ജന പറഞ്ഞു. തുടര്ന്ന് കോര്ണിയ അണുബാധ ചികിത്സിക്കുന്നതിനായി അദ്ദേഹം തെറാപ്യൂട്ടിക്ക് കോര്ണിയല് ട്രാന്സ്പ്ലാന്റേഷനു (കെരാടോപ്ലാസ്റ്റി) വിധേയനായെങ്കിലും അണുബാധയുടെ തീവ്രത കാരണം പരാജയപ്പെടുകയും കാഴ്ചയെ ബാധിക്കുകയും ചെയ്തു. കോര്ണിയയുടെ രോഗം ബാധിച്ച ഭാഗം തിരിച്ചറിയുകയും (എന്ഡോത്തീലിയല് ലെയര് – കോര്ണിയയുടെ ഏറ്റവും ഉള്ളിലെ ലെയര്) ആരോഗ്യമുള്ള കോര്ണിയയില് നിന്ന് ശേഖരിച്ച ടിഷ്യുകള് ഉപയോഗിച്ച് മാറ്റിസ്ഥാപിക്കുകയും ചെയ്തതായും അവര് അറിയിച്ചു.
നല്ല ഡോണര് ടിഷ്യുവിന്റെ ലഭ്യതക്കുറവ് മൂലം ട്രാന്സ്പഌന്റ് ആഗ്രഹിക്കുന്ന രോഗികളുടെ നീണ്ട പട്ടികയാണ് സംസ്ഥാനത്ത് ഉള്ളതെന്നും അതിനാല് കണ്ണുകള് ദാനം ചെയ്യാന് ആളുകളെ പ്രോത്സാഹിപ്പിക്കുന്നത് കോര്ണിയ അന്ധത ബാധിച്ചവരുടെ എണ്ണം കുറയ്ക്കാന് സഹായമാകുമെന്നും ഡോ. അഗര്വാള്സ് ഐ ഹോസ്പിറ്റലിലെ ക്ലിനിക്കല് സര്വീസസ് ഹെഡ് ഡോ. സൗന്ദരി ചൂണ്ടിക്കാട്ടി.
