ആലപ്പുഴ: നിര്മ്മാണം പൂര്ത്തിയാക്കിയ ആലപ്പുഴ ജനറല് ആശുപത്രിയിലെ പുതിയ കെട്ടിടം ആഗസ്തില് തുറക്കും. മുഴുവന് ഔട്ട് പേഷ്യന്റ് വിഭാഗവും ഇവിടേക്ക് മാറ്റും. കെട്ടിട നിര്മാണം പൂര്ത്തിയായെങ്കിലും ഉപകരണങ്ങളും ഫര്ണീച്ചറും ഉള്പ്പെടെയുള്ള സൗകര്യങ്ങള് സജ്ജമാക്കിയ ശേഷം പുതിയ കെട്ടിടത്തിന്റെ ഉദ്ഘാടനം നടത്താമെന്ന് എച്ച്. സലാം എംഎല്എ യോഗത്തില് പറഞ്ഞു. ജനറല് ആശുപത്രിയില് ചേര്ന്ന ആശുപത്രി ഉപദേശക സമിതിയോഗത്തില് സംസാരിക്കുകയായിരുന്നു അദ്ദേഹം.
ഫാര്മസി, ലാബ്, റേഡിയോളജി വിഭാഗങ്ങളുള്പ്പെടെ നിലവില് പ്രവര്ത്തിച്ചുവരുന്ന എല്ലാ ഒപിയും പുതിയ കെട്ടിടത്തിലേക്ക് മാറും. എംആര്ഐ, മാമോഗ്രാം, എക്സ് റേ എന്നിവയുടെ ഇന്സ്റ്റലേഷന് നടപടികള് തുടരുകയാണ്. സിറ്റി, അള്ട്രാ സൗണ്ട് ഉള്പ്പടെയുള്ള അത്യാധുനിക സൗകര്യങ്ങളും പുതിയ കെട്ടിടത്തില് ഉണ്ടാകും. പുതിയ ഒപി ബ്ലോക്ക് നിര്മാണത്തിന് 117 കോടി രൂപയാണ് ഉള്പ്പെടുത്തിയിരുന്നത്. കെട്ടിട നിര്മാണം പൂര്ത്തീകരിച്ച് കെട്ടിടം കൈമാറിയിട്ടുണ്ട്. മെഷീനറിയുടെ സ്ഥാപന നടപടികളാണ് ഇപ്പോള് പുരോഗമിക്കുന്നത്.
യോഗത്തില് നഗരസഭാ ചെയര് പേഴ്സണ് കെ.കെ.ജയമ്മ, വൈസ് ചെയര്മാന് പി.എസ്.എം.ഹുസൈ ന്, സ്ഥിരം സമിതി അധ്യക്ഷരായ എ.എസ്.കവിത, എം. ആര്.പ്രേം,
അംഗങ്ങളായ പി.എസ്.ഫൈസല്, ബി.നസീര്, ഡിഎംഓ ഡോ.ജമുന വര്ഗ്ഗീസ്, മെഡിക്കല് സൂപ്രണ്ട് ഡോ.ആര്.സന്ധ്യ, ആര്എംഒ ഡോ.എം.ആശ, മുനിസിപ്പല് എഞ്ചിനീയര് ഷിബു നാലപ്പാട്, അസിസ്റ്റന്റ് എഞ്ചിനീയര് അലിസ്റ്റര് തുടങ്ങിയവര് പങ്കെടുത്തു.
