വാഷിങ്ടണ്: മനുഷ്യനെയും വഹിച്ചുള്ള ബോയിങ് സ്റ്റാര്ലൈനര്, അന്താരാഷ്ട്ര ബഹിരാകാശ കേന്ദ്രത്തിലെത്താന് വൈകും. ഇന്നലെ രാത്രി 9.45ന് എത്തുമെന്നാണ് നേരത്തെ അറിയിച്ചിരുന്നത്. എന്നാല് പേടകത്തിന് തകരാര് കണ്ടെത്തിയെന്നും, ബഹിരാകാശ കേന്ദ്രത്തിന്റെ 200 മീറ്റര് അകലെ പേടകം സ്ഥിതി ചെയ്യുമെന്നും നാസ അറിയിച്ചു.
ബുധനാഴ്ച രാത്രി 8.22നാണ് സ്റ്റാര്ലൈനര് വിക്ഷേപിച്ചത്. സുനിത വില്യംസും ബുച്ച് വില്മോറുമാണ് പേടകത്തില് ബഹിരാകാശ കേന്ദ്രത്തിലേക്ക് യാത്ര തിരിച്ചത്. പേടകം ഡോക് ചെയ്ത ശേഷം വിവിധ പരീക്ഷണങ്ങളുമായി ഒരാഴ്ച അവിടെ തുടരും.
ഞങ്ങളെ ബഹിരാകാശത്തേക്കും അവിടെ നിന്ന് തിരിച്ചും കൊണ്ടു വരൂ എന്നായിരുന്നു ലിഫ്റ്റ് ഓഫിന് മിനിറ്റുകള്ക്ക് മുന്പായി സ്റ്റാര്ലൈനറിന്റെ പേര് പറഞ്ഞു കൊണ്ട് സുനിത മിഷന് കണ്ട്രോള് റൂമിലേക്ക് അയച്ച സന്ദേശം. പരീക്ഷണങ്ങള് നടത്തുന്നതിന് വേണ്ടി സുനിതയും വില്മോറും വളരെ അധികം കഠിനാധ്വാനം ചെയ്യുന്നുണ്ടെന്നാണ് നാസ പുറത്ത് വിട്ട അപ്ഡേറ്റില് അറിയിച്ചത്. സ്റ്റാര്ലൈനറിന്റെ വിക്ഷേപണത്തില് നാസയെ അഭിനന്ദിച്ച് സ്പേസ് എക്സ് സ്ഥാപകനും സിഇഒയുമായ ഇലോണ് മസ്കും രംഗത്തെത്തി. സ്റ്റാര്ലൈനര് ടു ദ സ്റ്റാര്സ് എന്ന നാസയുടെ കുറിപ്പും അദ്ദേഹം പോസ്റ്റ് ചെയ്തു.
