കോട്ടയം: സുരേഷ് ഗോപിയെ കുറിച്ചുള്ള റിപ്പോര്ട്ടര് ടി വി മാനേജിംഗ് എഡിറ്റര് ആന്റോ അഗസ്റ്റിന്റെ ഉപകാര സ്മരണ സോഷ്യല് മീഡിയയില് തരംഗമായി. സുരേഷ് ഗോപിയെ പരമാവധി താറടിക്കാനും പരാജയപ്പെടുമെന്നു സ്ഥാപിക്കാനും ശ്രമിച്ചുപോന്ന ചാനലാണ് റിപ്പോര്ട്ട് ടി.വി. എന്നാല് സുജയ പാര്വതി ഒഴികെ സഹപാനലിസ്റ്റുകളുടെ ദ്രോഹങ്ങള്ക്ക് പ്രായശ്ചിത്തം എന്നപോലെ കഴിഞ്ഞ ദിവസം ആന്റോ അഗസ്റ്റിന് ചര്ച്ചയില് പങ്കെടുത്ത് വെളിപ്പെടുത്തിയ ഒരു പഴയ സംഭവമാണ് ഇപ്പോള് സോഷ്യല് മീഡിയ ഏറ്റെടുത്തിരിക്കുന്നത്.
ആന്റോ അഗസ്റ്റിന് ഭക്ഷ്യവിഷബാധ മൂലം പ്ലേറ്റ്ലെറ്റ് താഴ്ന്നു പോകുന്ന ആരോഗ്യപ്രശ്നം ഉണ്ടായി. ആരോഗ്യനില വഷളായതോടെ കിംസ് ആശുപത്രിയില് നിന്ന് എത്രയും വേഗം വെല്ലൂരില് എത്തിക്കണമെന്ന് ഡോക്ടര്മാര് നിര്ദേശിച്ചു. എന്നാല് ലുലുവിന്റെ ഹെലിപാഡില് ഹെലിക്കോപ്റ്റര് ഇറക്കാന് പല വഴിക്ക് ശ്രമിച്ചെങ്കിലും അനുമതി ലഭിച്ചില്ല. ഒടുവിലാണ് സുരേഷ് ഗോപിയെ വിളിക്കുന്നത്. തൊട്ടടുത്ത മണിക്കൂറില് തന്നെ സുരേഷ് ഗോപി അനുമതി വാങ്ങി നല്കിയതായി ആന്റോ പറയുന്നു. എന്നാല് വെല്ലൂരില് തമിഴ്നാട് ഗവര്ണറുടെ ഹെലിക്കോപ്റ്റര് ഇറങ്ങേണ്ടതിനാല് ആന്റോയെ വഹിച്ചുകൊണ്ടുള്ള ഹെലികോപ്റ്റര് ആസമയം ലാന്ഡു ചെയ്യാന് കഴിയില്ലെന്ന് അധികൃതര് അറിയിച്ചു. ഇക്കാര്യം വീണ്ടും സുരേഷ് ഗോപിയെ വിളിച്ചറിയിച്ചു. സുരേഷ് ഗോപി പ്രധാനമന്ത്രിയുടെ ഓഫീസ് വഴി ഇടപെട്ട് ഗവര്ണ്ണറുടെ ലാന്ഡിംഗ് നീട്ടി വയ്പിക്കുകയും ആന്റോയെ സമയത്ത് ആശുപത്രിയില് എത്തിക്കുകയും ചെയ്തതായി വളരെ വികാരഭരിതനായാണ് അദ്ദേഹം വിവരിച്ചത്. ആശുപത്രിയില് മുന്തിയ പരിഗണന ലഭിച്ചതായും അദ്ദേഹം വെളിപ്പെടുത്തുന്നു. താനെന്നല്ല, ഏതു മനുഷ്യനോടും സുരേഷ് ഗോപിയുടെ കരുതല് ഇപ്രകാരമാണെന്ന് ആന്റോ അഗസ്റ്റിന് സാക്ഷ്യപ്പെടുത്തുന്നുണ്ട്.
