മട്ടന്നൂര്‍: കണ്ണൂര്‍ വിമാനത്താവളത്തിലൂടെ സ്വര്‍ണം കടത്തിയ കേസില്‍ എയര്‍ ഹോസ്റ്റസ് പിടിയിലായതിന് പിന്നാലെ മലയാളിയായ ക്യാബിന്‍ ക്രൂ അറസ്റ്റില്‍. എയര്‍ ഇന്ത്യ എക്സ്പ്രസ് ജീവനക്കാരന്‍ കണ്ണൂര്‍ തില്ലങ്കേരി സ്വദേശി സുഹൈലാണ് അറസ്റ്റിലായത്.ഡയറക്ടറേറ്റ് ഓഫ് റവന്യൂ ഇന്റലിജന്‍സ് ആണ് സുഹൈലിനെ അറസ്റ്റ് ചെയ്തത്.
പത്ത് വര്‍ഷമായി ക്യാബിന്‍ ക്രൂവായി ജോലി ചെയ്യുകയാണ് സുഹൈല്‍. പിടിയിലായ എയര്‍ ഹോസ്റ്റസ് സുരഭി ഖാത്തൂണിനെ സ്വര്‍ണം കടത്താന്‍ നിയോഗിച്ചത് സുഹൈലാണെന്ന് ഡിആര്‍ഐ പറഞ്ഞു.
കഴിഞ്ഞ ദിവസം മസ്‌ക്കറ്റില്‍നിന്നു കണ്ണൂരിലെത്തിയ എയര്‍ഇന്ത്യ എക്സ്പ്രസ് വിമാനത്തിലെ കാബിന്‍ ക്രൂ കൊല്‍ക്കത്ത സ്വദേശിനി സുരഭി ഖാതൂണില്‍നിന്നാണ് 60 ലക്ഷം വരുന്ന 960 ഗ്രാം സ്വര്‍ണം ഡിആര്‍ഐ പിടികൂടിയത്.
രഹസ്യവിവരപ്രകാരം ഡിആര്‍ഐ നടത്തിയ പരിശോധനയിലാണ് മലദ്വാരത്തില്‍ ഒളിപ്പിച്ചു കടത്താന്‍ ശ്രമിച്ച മിശ്രിതരൂപത്തിലുള്ള സ്വര്‍ണം പിടിച്ചത്. സുരഭി ഖാത്തൂണ്‍ 20 തവണയെങ്കിലും സ്വര്‍ണം കടത്തിയതായാണ് വിവരം.
