കൊല്ക്കത്ത: പ്രായപൂര്ത്തിയാകാത്ത പെണ്കുട്ടിക്ക് നേരെ ലൈംഗിക അതിക്രമം നടത്തിയ തൃണമൂല് കോണ്ഗ്രസുകാരനെ പോലീസ് അറസ്റ്റ് ചെയ്തു. തൃണമൂല് അതിക്രമങ്ങള്ക്ക് കുപ്രസിദ്ധമായ സന്ദേശ് ഖാലിയിലാണ് സംഭവം.
അമ്മയുടെ പരാതിയുടെ അടിസ്ഥാനത്തിലാണ് ഇയാളെ അറസ്റ്റ് ചെയ്തത്. വെള്ളിയാഴ്ച രാത്രിയാണ് സംഭവം. വീട്ടില് അതിക്രമിച്ച് കയറിയ പ്രതി എട്ടാം ക്ലാസുകാരിയായ പെണ്കുട്ടിയെ ഉപദ്രവിക്കുകയായിരുന്നു.
ഇയാളുടെ കൈയില് നിന്നും രക്ഷപ്പെട്ട് ഓടിയ പെണ്കുട്ടി ബഹളം വച്ചതിനെത്തുടര്ന്ന് വീട്ടുകാരും അയല്വാസികളും ഓടിയെത്തുകയായിരുന്നു. തുടര്ന്ന് പോലീസെത്തി ഇരുപതുകാരനായ പ്രതിയെ അറസ്റ്റ് ചെയ്തു. ഇയാളെ ചോദ്യം ചെയ്ത് വരികയാണെന്നും ബാസിര്ഹട്ട് പോലീസ് അറിയിച്ചു.
തൃണമൂല് കോണ്ഗ്രസിന്റെ ഗുണ്ടാ നേതാവ് ഷാജഹാന് ഷെയ്ഖിന്റെ നേതൃത്വത്തില് സന്ദേശ്ഖാലിയില് ഗോത്രവര്ഗ സ്ത്രീകള്ക്കുനേരെ നടന്ന കൂട്ടമാനഭംഗങ്ങളും ഭൂമി തട്ടിയെടുക്കലും ഏറെ പ്രതിഷേധത്തിനിടയാക്കിയിരുന്നു. ഇതിനെത്തുടര്ന്ന് കല്ക്കട്ട ഹൈക്കോടതിയുടെ നിര്ദേശപ്രകാരം അറസ്റ്റിലായ ഷാജഹാന് ഷെയ്ഖ് ഇപ്പോള് ജയിലിലാണ്. കേസ് കോടതി നിര്ദേശപ്രകാരം സിബിഐയാണ് അന്വേഷിക്കുന്നത്.
