ഏലപ്പാറ(ഇടുക്കി): ഏലപ്പാറയില് പനി ബാധിച്ച് പത്തുവയസുകാരി മരിച്ചു. പശുപ്പാറ പുളിങ്കട്ട ഈന്തുംകാലാ പുതുവല് ജഗദീഷ് ഭവനില് ജഗദീഷ് ശാരദ ദമ്പതികളുടെ മകള് അതുല്യ ജഗദീഷ് ആണ് മരിച്ചത്. പനി ബാധിച്ച് ഒരാഴ്ചയോളമായി പീരുമേട് താലൂക്ക് ആശുപത്രിയില് ചികിത്സയിലായിരുന്നു.
വെള്ളിയാഴ്ച രാവിലെ ചികിത്സ കഴിഞ്ഞ് വീട്ടിലേക്ക് മടങ്ങുകയും രാത്രി പനി കൂടുതലായതിനെ തുടര്ന്ന് തിരികെ ആശുപത്രിയില് പ്രവേശിപ്പിച്ചു. ഇന്നലെ പുലര്ച്ചെ മൂന്ന് മണിയോടുകൂടി മരിക്കുകയായിരുന്നു. മൃതദേഹം പ്രാഥമിക നടപടികള് പൂര്ത്തിയാക്കി പോസ്റ്റ്മോര്ട്ടത്തിനായി ഇടുക്കി മെഡിക്കല് കോളജിലേക്ക് മാറ്റി. കൃത്യമായ മരണകാരണം പോസ്റ്റ്മോര്ട്ടം റിപ്പോര്ട്ടിന് ശേഷമേ വ്യക്തമാവുകയുള്ളൂ. സംഭവത്തില് പീരുമേട് പോലീസ് അന്വേഷണം ആരംഭിച്ചു. സഹോദരങ്ങള്: ആദിശ്, ആരിശ് (ഇരുവരും വിദ്യാര്ത്ഥികള്). സംസ്കാരം ഇന്ന് രാവിലെ 10ന് വീട്ടുവളപ്പില്.
