ന്യൂദല്ഹി: കൊവാക്സിന്റെ പാര്ശ്വഫലങ്ങള് സംബന്ധിച്ച പഠനറിപ്പോര്ട്ട് പുറത്തുവന്നതിനു പിന്നാലെ വിശദീകരണവുമായി നിര്മാതാക്കളായ ഭാരത് ബയോടെക്. ബനാറസ് ഹിന്ദു സര്വകലാശാല നടത്തിയ പഠനത്തില് പിഴവുണ്ടെന്ന് ഭാരത് ബയോടെക് പറഞ്ഞു.
സ്പ്രിംഗര്ഇങ്ക് എന്ന ജേര്ണലിലാണ് പഠനം പ്രസിദ്ധീകരിച്ചത്. കൊവാക്സിനെടുത്ത മൂന്നിലൊരാള്ക്കും പാര്ശ്വഫലങ്ങളുണ്ടായിട്ടുണ്ടെന്നാണ് പഠനത്തില് പറയുന്നത്.
926 പേരെ ഒരുവര്ഷത്തോളം നിരീക്ഷിച്ച് ആരോഗ്യവിവരങ്ങള് ശേഖരിച്ചാണ് പഠനം നടത്തിയത്. തുടര്ന്നാണ് ഇവരില് അമ്പതുശതമാനം പേര്ക്കും അണുബാധ ഉണ്ടായിട്ടുണ്ടെന്നും പ്രത്യേകിച്ച് ശ്വസനേന്ദ്രിയത്തെ ബാധിക്കുന്ന അണുബാധയാണ് ഉണ്ടായതെന്നും കണ്ടെത്തിയത്. ശ്വാസകോശാണുബാധ, ഹൃദയാഘാതം, ഞരമ്പിനെ ബാധിക്കുന്ന രോഗങ്ങള്, ചര്മരോഗങ്ങള് തുടങ്ങിയവ റിപ്പോര്ട്ട് ചെയ്തുവെന്നും പഠനത്തിലുണ്ട്.
ആര്ത്തവ സംബന്ധമായ തകരാറുകള്, ഹൈപോതൈറോയ്ഡിസം, പക്ഷാഘാതം തുടങ്ങിയവയും വാക്സിന് എടുത്തവരില് റിപ്പോര്ട്ട് ചെയ്തതായി പഠനത്തില് പറയുന്നു. അനുബന്ധ രോഗങ്ങള് ഉണ്ടായിരുന്നവരിലാണ് പാര്ശ്വഫലങ്ങള് കൂടുതല് കണ്ടതെന്നും വിഷയത്തില് കൂടുതല് ആഴത്തിലുള്ള പഠനങ്ങള് നടത്തേണ്ടത് അനിവാര്യമാണെന്നും പറയുന്നുണ്ട്.
കൊവിഷീല്ഡ് വാക്സിന്റെ പാര്ശ്വഫലങ്ങളെക്കുറിച്ച് നിര്മാതാക്കളായ ആസ്ട്രസെനക്ക തുറന്നുപറയുകയും ആഗോളതലത്തില് മരുന്ന് പിന്വലിക്കുകയും ചെയ്തതിനു പിന്നാലെയാണ് ഈ പഠനം പുറത്തുവന്നിരിക്കുന്നത്. കൊവാക്സിന് പാര്ശ്വഫലങ്ങളൊന്നുമില്ലെന്ന് ഭാരത് ബയോടെക് നേരത്തേ വ്യക്തമാക്കിയിരുന്നു. പ്രഥമപരിഗണന സുരക്ഷിതത്വത്തിന് എന്ന ഉദ്ദേശത്തോടെയാണ് കൊവാക്സിന് വികസിപ്പിച്ചതെന്നും കേന്ദ്ര സര്ക്കാരിന്റെ കൊവിഡ് പ്രതിരോധ പദ്ധതികളുടെ ഭാഗമായി ഫലപ്രാപ്തി പരിശോധനകളും പരീക്ഷണങ്ങളും നടത്തിയ ഏക വാക്സിന് കൊവാക്സിനാണെന്നും കമ്പനി അവകാശപ്പെട്ടിരുന്നു.
ബ്രിട്ടനിലുള്ള ജാമി സ്കോട്ട് എന്നയാളുടെ പരാതിക്കു പിന്നാലെയാണ് കൊവിഷീല്ഡിനെക്കുറിച്ചുള്ള വിവാദങ്ങള് ഉയര്ന്നത്. 2021 ഏപ്രിലില് വാക്സിന് സ്വീകരിച്ചതിനു പിന്നാലെ തന്റെ മസ്തിഷ്കത്തിന് തകരാര് സംഭവിച്ചെന്നും രക്തം കട്ടപിടിച്ചെന്നും ചൂണ്ടിക്കാട്ടിയാണ് ജാമി പരാതി നല്കിയത്. തുടര്ന്നാണ് യുകെ ഹൈക്കോടതിക്ക് മുമ്പിലെത്തിയ പരാതിയില് വളരെ അപൂര്വമായ കേസുകളില് ത്രോംബോസിസ് വിത്ത് ത്രോംബോസൈറ്റോപീനിയ സിന്ഡ്രോമിന് കൊവിഷീല്ഡ് കാരണമാകാമെന്ന് കമ്പനി മറുപടി നല്കിയത്. രക്തം കട്ടപിടിക്കുകയും പ്ലേറ്റ്ലേറ്റ് കൗണ്ട് കുറയുകയും ചെയ്യുന്ന സാഹചര്യമാണിത്.
