ന്യൂഡല്‍ഹി: ദക്ഷിണാഫ്രിക്കന്‍ വനിതാ ക്രിക്കറ്റ് ടീമിന്റെ ഇന്ത്യന്‍ പര്യടനത്തിന്റെ ഷെഡ്യൂള്‍ പ്രഖ്യാപിച്ചു. ഇന്ത്യ ദക്ഷിണാഫ്രിക്കയ്‌ക്കെതിരെ മൂന്ന് ഏകദിനങ്ങള്‍ക്കും ഒരു ടെസ്റ്റിനും മൂന്ന് ടി20 മത്സരങ്ങള്‍ക്കും ആതിഥേയത്വം വഹിക്കുമെന്ന് ബിസിസിഐ പ്രസ്താവനയില്‍ പറഞ്ഞു. മൂന്ന് മത്സരങ്ങളുള്ള ഏകദിന പരമ്പരയോടെ പരമ്പര ആരംഭിക്കും, തുടര്‍ന്ന് ഒരു ടെസ്റ്റ് മത്സരവും മൂന്ന് മത്സരങ്ങളുടെ ടി20 ഐ പരമ്പരയോടെ സമാപിക്കും.
ഏകദിന പരമ്പരയ്‌ക്ക് മുമ്പ്, ജൂണ്‍ 13ന് ബോര്‍ഡ് പ്രസിഡന്റ്സ് ഇലവനെതിരേ ബംഗളൂരുവില്‍ സന്നാഹ മത്സരം സന്ദര്‍ശക സംഘം കളിക്കും. മൂന്ന് മത്സരങ്ങളുള്ള ഏകദിന പരമ്പരയും ബെംഗളൂരുവില്‍ നടക്കും. ശേഷിക്കുന്ന പരമ്പര ചെന്നൈയില്‍ നടക്കും. സന്നാഹ മത്സരത്തിന് ശേഷം മൂന്ന് ഏകദിനങ്ങള്‍ യഥാക്രമം ജൂണ്‍ 16, 19, 23 തീയതികളില്‍ നടക്കും. ജൂണ്‍ 28 മുതല്‍ ജൂലൈ 1 വരെയാണ് ഏക ടെസ്റ്റ്. ഒടുവില്‍ മൂന്ന് ടി20 മത്സരങ്ങള്‍ യഥാക്രമം ജൂലൈ 5, 7, 9 തീയതികളില്‍ നടക്കും.
