ഷിംല: തെരഞ്ഞെടുപ്പിന് മുന്നോടിയായി ഹിമാചല്‍പ്രദേശിലെ ശ്രീഅവാദേവീ ക്ഷേത്രത്തില്‍ ദര്‍ശനം നടത്തി കേന്ദ്രമന്ത്രി അനുരാഗ് ഠാക്കൂര്‍. ഹമീര്‍പൂര്‍ മണ്ഡലത്തിലെ എന്‍ഡിഎ സ്ഥാനാര്‍ത്ഥിയാണദ്ദേഹം. ഹാമീപൂരില്‍ നിന്ന് ഇത് അഞ്ചാം തവണയാണ് ഠാക്കൂര്‍ ജനവിധി തേടാനൊരുങ്ങുന്നത്.
കുടുംബപരദേവതയായ ശ്രീഅവാദേവീ ക്ഷേത്രത്തില്‍ പ്രാര്‍ത്ഥിച്ചശേഷമാണ് കഴിഞ്ഞ തവണയും ഠാക്കൂര്‍ മണ്ഡലത്തിലെ തെര. പ്രചാരണത്തിനായി ഇറങ്ങിയത്. പിന്നീട് വീട്ടിലെത്തിയ ശേഷം കന്യാപൂജയും മാതാപിതാക്കളില്‍ നിന്നും അനുഗ്രഹാശിസുകളും വാങ്ങിയാണ് ഠാക്കൂര്‍ തെരഞ്ഞെടുപ്പ് പ്രചാരണത്തിനിറങ്ങിയത്.
കഴിഞ്ഞ എല്ലാ തെരഞ്ഞെടുപ്പിലും തന്നെ പിന്തുണച്ച വോട്ടര്‍മാര്‍ ഇത്തവണയും തന്നോടൊപ്പമുണ്ടാകുമെന്നാണ് വിശ്വാസം. ജനങ്ങളുടെ അനുഗ്രഹമാണ് തങ്ങളുടെ സമ്പത്ത്. ഇതാണ് ബിജെപിയുടെ വിജയമെന്നും കേന്ദ്രമന്ത്രി കൂട്ടിച്ചേര്‍ത്തു. ഹിമാചലില്‍ ജൂണ്‍ ഒന്നിനാണ് ലോക്സഭാ തെരഞ്ഞെടുപ്പ്. 2019-ലെ ലോക്സഭാ തെരഞ്ഞെടുപ്പില്‍ ഹമീര്‍പൂര്‍, മാണ്ഡി, ഷിംല, കാന്‍ഗ്ര എന്നീ മണ്ഡലങ്ങളില്‍ ബിജെപി സ്ഥാനാര്‍ത്ഥികളാണ് വിജയിച്ചത്.
