ന്യൂദല്‍ഹി : എയര്‍ ഇന്ത്യാ എക്‌സ്പ്രസ് ജീവനക്കാരും മാനേജ്‌മെന്റും തമ്മില്‍ നടന്ന ചര്‍ച്ച വിജയിച്ചതിനെ തുടര്‍ന്ന് സമരം അവസാനിപ്പിക്കാന്‍ ജീവനക്കാരുടെ തീരുമാനം. ഇതോടെ രണ്ട് ദിവസമായി മുടങ്ങിയ വിമാന സര്‍വീസുകള്‍ പുനരാരംഭിക്കും.
പിരിച്ചുവിട്ടവരെ തിരിച്ചെടുക്കണമെന്ന ആവശ്യം യൂണിയന്‍ ചര്‍ച്ചയില്‍ ഉന്നയിക്കുകയും മാനേജമന്റ് അംഗീകരിക്കുകയും ചെയ്തതാണ് സമരം അവസാനിപ്പിക്കാനുള്ള ധാരണയിലേക്ക് ഇരു പക്ഷവും എത്താന്‍ കാരണം. സിഇഒ യോഗത്തില്‍ പങ്കെടുക്കാത്തതിന്റെ അതൃപ്തി യൂണിയന്‍ അറിയിച്ചു. സെന്‍ട്രല്‍ ലേബര്‍ കമ്മീഷണറുടെ നേതൃത്വത്തിലാണ് ചര്‍ച്ച നടന്നത്.
എയര്‍ ഇന്ത്യ എക്‌സ്പ്രസ് എംപ്ലോയീസ് യൂണിയനിലുള്ള 300 ജീവനക്കാരാണ് കൂട്ടമായി അസുഖ അവധിയെടുത്തത്. സമരത്തെ തുടര്‍ന്ന് 85 വിമാനങ്ങളാണ് റദ്ദാക്കിയത്. ഇത് കാരണം ആയിരക്കണക്കിന് യാത്രക്കാരാണ് വലഞ്ഞത്.
