പരിഭ്രാന്തരാകരുതെന്ന് രക്ഷിതാക്കളോട് അഭ്യർത്ഥിച്ച് അതിഷി , ഭീഷണി സന്ദേശം നൂറ് സ്കൂളുകൾ കടന്നു : തല പുകഞ്ഞ് പോലീസ്

ന്യൂദൽഹി : നൂറോളം ദൽഹി-എൻസിആർ സ്‌കൂളുകൾക്ക് ബോംബ് ഭീഷണിയുള്ള സാഹചര്യത്തിൽ രക്ഷിതാക്കൾ പരിഭ്രാന്തരാകരുതെന്ന് ദൽഹി വിദ്യാഭ്യാസ മന്ത്രി അതിഷി അഭ്യർത്ഥിച്ചു. അതേ സമയം ഇമെയിലുകളുടെ ഐപി വിലാസവും കണ്ടെത്താനുള്ള ശ്രമത്തിലാണ് പോലീസ്.

ദൽഹി-എൻസിആറിലെ നൂറോളം സ്‌കൂളുകൾക്ക് ബുധനാഴ്ച രാവിലെ ബോംബ് ഭീഷണി ലഭിച്ചതിനെ തുടർന്ന് വിദ്യാർത്ഥികളെ വീട്ടിലേക്ക് അയച്ചതായി റിപ്പോർട്ടുകൾ പറയുന്നു. ഭീഷണി വ്യാജമാണെന്ന് തോന്നുന്നുവെന്ന് കേന്ദ്ര ആഭ്യന്തര മന്ത്രാലയം പറഞ്ഞു.

“ഇന്ന് രാവിലെ ചില സ്‌കൂളുകൾക്ക് ബോംബ് ഭീഷണിയുണ്ട്. വിദ്യാർത്ഥികളെ ഒഴിപ്പിച്ചു, ആ പരിസരത്ത് ദൽഹി പോലീസ് തിരച്ചിൽ നടത്തുന്നു. ഇതുവരെ ഒരു സ്‌കൂളിലും ഒന്നും കണ്ടെത്തിയിട്ടില്ല. ഞങ്ങൾ പോലീസുമായും സ്‌കൂളുകളുമായും നിരന്തരം സമ്പർക്കം പുലർത്തുന്നതിനാൽ, ആവശ്യമുള്ളിടത്തെല്ലാം സ്‌കൂൾ അധികൃതർ പരിഭ്രാന്തരാകരുതെന്ന് അഭ്യർത്ഥിക്കുന്നു” – ദൽഹി വിദ്യാഭ്യാസ മന്ത്രി അതിഷി സംഭവവികാസം സ്ഥിരീകരിച്ച് എക്‌സിൽ പോസ്റ്റ് ചെയ്തു.

ഭീഷണിയെ തുടർന്ന് മദർ മേരി സ്കൂൾ പരീക്ഷ പാതിവഴിയിൽ നിർത്തി. ഈസ്റ്റ് ദൽഹി മയൂർ വിഹാറിലെ മദർ മേരീസ് സ്കൂളിൽ ഇന്ന് രാവിലെ ബോംബ് ഭീഷണി സംബന്ധിച്ച ഒരു ഇമെയിൽ ലഭിച്ചു. സ്‌കൂൾ ഒഴിപ്പിക്കുകയും സ്‌കൂൾ പരിസരം വിശദമായി പരിശോധിക്കുകയും ചെയ്യുന്നുണ്ടെന്ന് ദൽഹി പോലീസ് അറിയിച്ചു.

ദ്വാരകയിലെ ദൽഹി പബ്ലിക് സ്‌കൂൾ, വസന്ത് കുഞ്ചിലെ ദൽഹി പബ്ലിക് സ്‌കൂൾ, സാകേതിലെ അമിറ്റി ഇൻ്റർനാഷണൽ സ്‌കൂൾ, ചാണക്യപുരിയിലെ സംസ്‌കൃതി സ്‌കൂൾ, നോയിഡ സെക്ടർ 30ലെ ഡൽഹി പബ്ലിക് സ്‌കൂൾ എന്നിവയാണ് ഭീഷണി നേരിടുന്ന മറ്റ് സ്‌കൂളുകൾ.

ബോംബ് ഡിറ്റക്ഷൻ ടീം, ബോംബ് ഡിസ്പോസൽ സ്‌ക്വാഡ് എന്നിവയ്‌ക്കൊപ്പം ദൽഹി പോലീസ് ക്യാമ്പസ് പരിസരത്ത് തിരച്ചിൽ നടത്താൻ സ്‌കൂളിലെത്തി. ദൽഹി അഗ്നിശമനസേനയും ജാഗ്രതയിലാണ്.

കൂടുതൽ സ്കൂളുകൾക്ക് സമാനമായ മെയിലുകൾ ലഭിച്ചതായി പറയപ്പെടുന്നു. ഈ ഭീഷണികൾക്കെല്ലാം ഉത്തരവാദി ഒരൊറ്റ വ്യക്തിയാണെന്ന് സംശയിക്കുന്നുവെന്ന് ഒരു ഉന്നത പോലീസ് ഉദ്യോഗസ്ഥനെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്തു. ഇമെയിലുകളുടെ ഐപി വിലാസവും കണ്ടെത്താനുള്ള ശ്രമത്തിലാണ് പോലീസ്. അയച്ചയാൾ തങ്ങളുടെ ഐഡൻ്റിറ്റി മറയ്‌ക്കാൻ വിപിഎൻ ഉപയോഗിച്ചിരിക്കാമെന്ന് പോലീസ് പറയുന്നു. ദൽഹിയിലെ ഷാഹ്‌ദാരയിലെ ചാച്ചാ നെഹ്‌റു ആശുപത്രിക്ക് ചൊവ്വാഴ്ച രാവിലെ ഇമെയിൽ വഴി ബോംബ് ഭീഷണി ലഭിച്ചിരുന്നു.

തിങ്കളാഴ്ച ഭോപ്പാലിലെ രാജാ ഭോജ് അന്താരാഷ്‌ട്ര വിമാനത്താവളം, ഗോവയിലെ ദബോലിം വിമാനത്താവളം, കൊൽക്കത്തയിലെ നേതാജി സുഭാഷ് ചന്ദ്രബോസ് അന്താരാഷ്‌ട്ര വിമാനത്താവളം, ജയ്‌പൂർ അന്താരാഷ്‌ട്ര വിമാനത്താവളം എന്നിവിടങ്ങളിൽ ബോംബ് ഭീഷണിയുണ്ടായിരുന്നു.

ഇതാദ്യമായല്ല ദൽഹി പബ്ലിക് സ്കൂൾ ശാഖകൾക്ക് ഇത്തരം ഭീഷണികൾ ഉണ്ടാകുന്നത്. ഫെബ്രുവരിയിൽ ദൽഹി പബ്ലിക് സ്കൂൾ ആർ.കെ. പുരത്തിന് വ്യാജ ബോംബ് ഭീഷണി ഉണ്ടായിരുന്നു. 2023 മെയ് മാസത്തിൽ മഥുര റോഡിലെ ദൽഹി പബ്ലിക് സ്കൂളിനും ഇമെയിൽ വഴി വ്യാജ ബോംബ് ഭീഷണി ലഭിച്ചിരുന്നു.