കോഴിക്കോട്: പാനൂര് സ്ഫോടനവുമായി ബന്ധപ്പെട്ട് അറസ്റ്റിലായവരുടെ റിമാന്ഡ് റിപ്പോര്ട്ട് ഗൗരവമേറിയതാണെന്ന് ബിജെപി അധ്യക്ഷനും വയനാട്ടിലെ എൻഡിഎ സ്ഥാനാർത്ഥിയുമായ സുരേന്ദ്രന് പറഞ്ഞു. ബിജെപി-ആര്.എസ്.എസ്. പ്രവര്ത്തകരെ ലക്ഷ്യമിട്ടാണ് ബോംബ് നിര്മാണം നടന്നതെന്നും അദ്ദേഹം പറഞ്ഞു.
സിപി എമ്മിന്റെ ഉന്നത നേതൃത്വത്തിന്റെ അ റിവോടെയാണ് പാനൂരിലെ ബോംബ് നിർമാണം. ഇക്കാര്യത്തിൽ മുഖ്യമന്ത്രി പിണറായി വിജയൻ മൗനം വെടിയണം. ബോംബ് സംസ്ഥാന വ്യാപകമായി ഉപയോഗിക്കാനാണോ എന്നും സംശയമുണ്ടെന്നും സുരേന്ദ്രൻ പറഞ്ഞു. തെരഞ്ഞെടുപ്പ് അട്ടിമറിക്കാനുള്ള ആസൂത്രിത നീക്കമാണ് നടക്കുന്നത്. ഇക്കാര്യത്തിൽ തെരഞ്ഞെടുപ്പ് കമ്മിഷന്റെ ഇടപെടൽ വേണം. ആറ്റിങ്ങലിലെ ബിജെപി സ്ഥാനാർഥി വി. മുരളീധരന്റെ വാഹനം തടഞ്ഞ സംഭവത്തിൽ ഡിവൈഎഫ്ഐ പ്രവർത്തകരാണ് പ്രതികളെന്നും അദ്ദേഹം കൂട്ടിച്ചേർത്തു.
വൈദേശിക ആധിപത്യത്തിന്റെ ഭാഗമായാണ് സുൽത്താൻ ബത്തേരി എന്ന പേര് വന്നത്. സുൽത്താൻ ബത്തേരിയല്ല അത് ഗണപതിവട്ടമാണ്. ഇക്കാര്യം ഞാൻ പറഞ്ഞതല്ല, 1984ൽ പ്രമോദ് മഹാജൻ ഇക്കാര്യം പറഞ്ഞിട്ടുണ്ടെന്നും സുരേന്ദ്രൻ വാർത്താസമ്മേളനത്തിൽ പറഞ്ഞു.
