ചാലക്കുടി: അതിരപ്പിള്ളി വനമേഖലയില്‍ കാണപ്പെട്ടിരുന്ന തുമ്പിക്കൈയില്ലാത്ത ആനക്കുട്ടിയുടെ അതീജിവനത്തിന്റെ ആശങ്കയൊഴിയുന്നു. വ്യാഴാഴ്ച രാവിലെ തുമ്പൂര്‍മുഴി പത്താറ് ഭാഗത്ത് പന്ത്രണ്ടോളം ആനകളുടെ കൂടെയാണ് തുമ്പിയില്ലാത്ത ആനക്കുട്ടി റോഡ് മുറിച്ച് കടന്ന് വനത്തിലേക്ക് കയറി പോയത്. കഴിഞ്ഞ ദിവസം ഇതിന്റെ സമീപത്ത് പുഴയില്‍ വെള്ളം കുടിക്കുവാനും എത്തിയിരുന്നു. കുറച്ച് ദിവസമായി തുമ്പിയില്ലാത്ത ആനക്കുട്ടിയടങ്ങുന്ന സംഘത്തെ ഈ മേഖലയില്‍ കണ്ടിരുന്നതായി പരിസരവാസികള്‍ പറഞ്ഞു.
ഏകദേശം രണ്ട് വര്‍ഷം മുന്‍പാണ് തുമ്പിയില്ലാത്ത ആനക്കുട്ടിയെ അതിരപ്പിള്ളി വനമേഖലയില്‍ ആദ്യം കാണപ്പെടുന്നത്. അന്ന് ആനപ്രേമികളുടെ ഇടയില്‍ വലിയ ചര്‍ച്ചയായിരുന്നു. തുമ്പിയില്ലാത്ത ആനക്കുട്ടി എന്ത് ചെയ്യുമെന്ന ആശങ്കയുണ്ടായിരുന്നു. എന്നാല്‍ ഇപ്പോള്‍ ചെറിയ തുമ്പി ഉപയോഗിച്ച് വെള്ളവും ഭക്ഷണവും കഴിച്ച് ഊര്‍ജ്ജസ്വലനായി തന്നെയാണ് ആനക്കുട്ടിയെ കാണപ്പെടുന്നത്.
ചെറുതും വലതുമായി പന്ത്രണ്ടംഗ സംഘത്തിന്റെ ഒപ്പമുള്ള തുമ്പിയില്ലാത്ത ആനക്കുട്ടി റോഡ് മുറിച്ച് കടക്കുന്ന ദൃശ്യം പകര്‍ത്തിയത്ത് വള്ളുവനാട് നാദം നാടക ട്രൂപ്പിലെ അതിരപ്പിള്ളി സ്വദേശിയായ ആനന്ദ് മുരുകനാണ്. ഇദ്ദേഹം പരിപാടിക്കായി വീട്ടില്‍ നിന്ന് ചാലക്കുടിയിലേക്ക് വരുമ്പോഴാണ് ആനസംഘം റോഡ് മുറിച്ച് കടക്കുന്ന ദൃശ്യം പകര്‍ത്തിയത്. ഭക്ഷണം തേടി കാടുകളില്‍ നിന്ന് ജനവാസമേഖലയിലേക്ക് ആനകള്‍ ഇറങ്ങുന്നത് പതിവാണെങ്കിലും മറ്റും നാശനഷ്ടങ്ങള്‍ വരുതാതിരിക്കുന്നതും വലിയ ഭാഗ്യമാണെന്ന് നാട്ടുകാര്‍ പറഞ്ഞു. ആനകള്‍ കടന്നു പോയ സമയത്ത് വാഹന ഗതാഗതം തടസപ്പെട്ടിരുന്നു.
പ്രതികരിക്കാൻ ഇവിടെ എഴുതുക: