കൊല്ക്കത്ത: ഭാര്യയെ കുത്തിക്കൊന്ന് റിട്ട. ആര്മി ഡോക്ടര് ആത്മഹത്യക്ക് ശ്രമിച്ചു. കൊല്ക്കത്ത സാള്ട്ട് ലേക്ക് സ്വദേശിയായ ജാഥുനാഥ് മിത്ര(84)യാണ് ഭാര്യ മന്ദിര മിത്ര(73)യെ കൊലപ്പെടുത്തിയ ശേഷം ആത്മഹത്യക്ക് ശ്രമിച്ചത്. ആസിഡ് കഴിച്ച് ഗുരുതരാവസ്ഥയില് കണ്ടെത്തിയ ജാഥുനാഥ് മിത്രയെ പിന്നീട് ആശുപത്രിയില് പ്രവേശിപ്പിച്ചു.
ജോലിക്കാരിയാണ് ഗൃഹനാഥനെ അവശനിലയില് വീട്ടില് കണ്ടെത്തിയത്. പോലീസെത്തി പരിശോധിച്ചപ്പോഴാണ് മന്ദിര മിത്രയെ കുളിമുറിയില് കൊല്ലപ്പെട്ട നിലയില് കണ്ടെത്തിയത്. ശരീരമാസകലം നിരവധിതവണ കുത്തേറ്റ നിലയിലായിരുന്നു മൃതദേഹം.
വീട്ടിലെ കസേരയില് അവശനായനിലയിലാണ് ജാഥുനാ
ഥ് മിത്രയെ കണ്ടെത്തിയത്. ഇദ്ദേഹത്തിന്റെ ശരീരത്തിലും കുത്തേറ്റ മുറിവുകളുണ്ടായിരുന്നു. ഇത് സ്വയം മുറിവേല്പ്പിച്ചതാണെന്നാണ് പോലീസ് പറയുന്നത്. പിന്നീട് ആശുപത്രിയിലെത്തിച്ചതോടെയാണ് ആസിഡ് ഉള്ളില്ച്ചെന്നതായും വ്യക്തമായത്. ചികിത്സയിലുള്ള ഇദ്ദേഹത്തിന്റെ നില അതീവ ഗുരുതരമാണെന്നാണ് റിപ്പോര്ട്ട്.
നേത്രരോഗവിദഗ്ധനാണ് ജാഥുനാഥ് മിത്ര. ഇദ്ദേഹം എഴുതിയതെന്ന് കരുതുന്ന രണ്ട് ആത്മഹത്യാക്കുറിപ്പുകള് കണ്ടെടുത്തിട്ടുണ്ട്. ഒരു കത്ത് ബംഗാളിയിലും രണ്ടാമത്തെ കത്ത് ഇംഗ്ലീഷിലുമാണ്.
അടുത്തിടെ കാര് വില്പ്പന നടത്തിയപ്പോള് ചില രേഖകള് മാറിപ്പോയതിന്റെ പേരില് ഭാര്യയും കുടുംബാംഗവും തന്നെ ശാസിച്ചെന്നും കത്തില് പറഞ്ഞിരുന്നു.
