മുംബൈ : മഹാരാഷ്‌ട്രയിലെ ഗഡ്‌ചിരോളി ജില്ലയിൽ ചൊവ്വാഴ്ച പോലീസുമായുള്ള ഏറ്റുമുട്ടലിൽ നാല് നക്‌സലൈറ്റുകൾ കൊല്ലപ്പെട്ടതായി മുതിർന്ന ഉദ്യോഗസ്ഥൻ അറിയിച്ചു. ഇവരുടെ തലയ്ക്ക് മൊത്തമായി 36 ലക്ഷം രൂപ പാരിതോഷികം സുരക്ഷാ സേന നേരത്തെ പ്രഖ്യാപിച്ചിരുന്നു.
അയൽ സംസ്ഥാനമായ തെലങ്കാനയിൽ നിന്ന് ചില നക്‌സലൈറ്റുകൾ പ്രൺഹിത നദി കടന്ന് ഗഡ്ചിരോളിയിലേക്ക് കടന്നതായി തിങ്കളാഴ്ച ഉച്ചയോടെ പോലീസിന് വിവരം ലഭിച്ചതായി പോലീസ് സൂപ്രണ്ട് നീലോത്പാൽ പറഞ്ഞു. വരാനിരിക്കുന്ന ലോക്‌സഭാ തെരഞ്ഞെടുപ്പിന്റെ മാതൃകാ പെരുമാറ്റച്ചട്ടം നിലനിൽക്കെ അട്ടിമറി പ്രവർത്തനങ്ങൾ നടത്തുക എന്ന ലക്ഷ്യത്തോടെയാണ് ഇവർ അതിർത്തി കടന്നതെന്ന് പോലീസ് വ്യക്തമാക്കി.
തുടർന്ന് നടത്തിയ അന്വേഷണത്തിലാണ് ഇവരെ സുരക്ഷാ സേന കണ്ടെത്തുന്നതും ആക്രമണത്തിലൂടെ വധിക്കുന്നതും.
