കൊച്ചി : വ്യാജ അഭിഭാഷകന്റെ എന്റോള്‍മെന്റ് ബാര്‍ കൗണ്‍സില്‍ റദ്ദാക്കി. വ്യാജ എല്‍എല്‍ബി സര്‍ട്ടിഫിക്കറ്റ് ഹാജരാക്കി അഭിഭാഷകനായി എന്റോള്‍ ചെയ്ത തിരുവനന്തപുരം വഞ്ചിയൂര്‍ സ്വദേശി മനു ജി രാജനെതിരെയാണ് നടപടി.
കേരളാ ഹൈക്കോടതി അഭിഭാഷകനായി പ്രവര്‍ത്തിക്കുകയായിരുന്നു ഇയാള്‍. പ്രതിയ്‌ക്കെതിരെ നിയമനടപടി സ്വീകരിക്കാനും ബാര്‍ കൗണ്‍സില്‍ തീരുമാനിച്ചു.
മനു ജി രാജനെതിരെ നേരത്തെ സെന്‍ട്രല്‍ പൊലീസ് കേസ് എടുത്തിരുന്നു. ബിഹാറിലെ മഗധ് സര്‍വകലാശാലയുടെ പേരിലാണ് മനു വ്യാജ സര്‍ട്ടിഫിക്കറ്റുണ്ടാക്കിയത്. 2013 ലാണ് വ്യാജ രേഖ ഹാജരാക്കി എന്റോള്‍ ചെയ്തത്.
മനു ജി രാജനെതിരെ മാറാനെല്ലൂര്‍ സ്വദേശി സച്ചിനാണ് ബാര്‍ കൗണ്‍സിലിനും പൊലീസിനും പരാതി നല്‍കിയത്. അന്വേഷണത്തില്‍ മനു ജി രാജന്‍ ബിരുദം നേടിയിട്ടില്ലെന്ന് സര്‍വ്വകലാശാല അറിയിക്കുകയായിരുന്നു.
