ചെന്നൈ : സനാതന ധര്‍മ്മത്തെ കുറിച്ച് മന്ത്രി ഉദയനിധി സ്റ്റാലിന്‍ നടത്തിയ വിമര്‍ശനവും തുടര്‍ന്നുളള വിവാദവും കെട്ടടങ്ങിയിട്ടില്ല.ഇതിന് പുറമെ ശ്രീരാമക്ഷേത്രം നിര്‍മ്മിച്ച് ഭക്തരുടെ ഹൃദയത്തിലിടം നേടിയ ബി ജെ പിയെ തെരഞ്ഞെടുപ്പില്‍ നേരിടാന്‍ നിരീശ്വര വാദം തത്കാലത്തേക്കെങ്കിലും മാറ്റി വയ്‌ക്കാനൊരുങ്ങുകയാണ് തമിഴ്‌നാട്ടിലെ ഭരണകക്ഷിയായ ഡി എം കെ.
തെരഞ്ഞെടുപ്പിന് മുന്നോടിയായി അന്താരാഷ്ട്ര മുരുകന്‍ ഫെസ്റ്റ് സംഘടിപ്പിക്കാനൊരുങ്ങുകയാണ് ഡി.എം.കെ. ലോകമെമ്പാടുമുള്ള മുരുക ഭക്തരെ ഉള്‍പ്പെടുത്തി ജൂണ്‍-ജൂലൈ മാസങ്ങളിലായിരിക്കും ഫെസ്റ്റ് സംഘടിപ്പിക്കുക.മുരുകനെ കുറിച്ചുള്ള ഗവേഷണ പ്രബന്ധങ്ങളും പ്രദര്‍ശനങ്ങളും സമ്മേളനങ്ങളും സംഘടിപ്പിക്കും.
അതേസമയം മുരുകന്‍ ഫെസ്റ്റ് നടത്താനുള്ള ഡി എം കെ തീരുമാനത്തെ ബി.ജെ.പി രൂക്ഷമായി വിമര്‍ശിച്ചു.’കേന്ദ്രത്തില്‍ നിന്നുള്ള പദ്ധതികളെ സ്റ്റിക്കര്‍ മാറ്റി ഡി.എം.കെ പദ്ധതികളാക്കുകയായിരുന്നു അവര്‍ ആദ്യം ചെയ്തിരുന്നത്. ഇപ്പോള്‍ അവര്‍ ഞങ്ങളുടെ പ്രത്യയശാസ്ത്രങ്ങള്‍ പകര്‍ത്തി രാഷ്‌ട്രീയത്തിലും ഉപയോഗിക്കുയാണ്’ എന്നാണ് ബി.ജെ.പി സംസ്ഥാന സെക്രട്ടറി ആര്‍ ശ്രീനിവാസന്‍ പ്രതികരിച്ചത്.
ഫെസ്റ്റിന്റെ പ്രധാന കേന്ദ്രമായി തിരുചെന്തൂര്‍ മുരുകന്‍ കോവില്‍ മാറ്റുമെന്നും ഇതിനായി 300 കോടി ക്ഷേത്ര നവീകരണ പ്രവര്‍ത്തനങ്ങള്‍ക്കായി അനുവദിച്ചിട്ടുണ്ടെന്നും സര്‍ക്കാര്‍ വ്യക്തമാക്കി. നേരത്തേ 2020ല്‍ ബി.ജെ.പി ‘വേല്‍ യാത്ര’ എന്ന പേരില്‍ ഘോഷയാത്ര സംഘടിപ്പിച്ചിരുന്നു.
പ്രതികരിക്കാൻ ഇവിടെ എഴുതുക: