ന്യൂദല്‍ഹി: ലോക്സഭാ തെരഞ്ഞെടുപ്പ് പ്രഖ്യാപനത്തിന് മുമ്പ് പൗരത്വ ഭേദഗതി നിയമം നടപ്പാക്കാന്‍ കേന്ദ്രം. പൗരത്വത്തിന് അപേക്ഷ നല്‍കുന്നതിനുള്ള പ്രത്യേക പോര്‍ട്ടല്‍ കേന്ദ്ര ആഭ്യന്തരമന്ത്രാലയം സജ്ജമാക്കി. പൗരത്വ ഭേദഗതി നിയമത്തിന്റെ ചട്ടങ്ങള്‍ മാര്‍ച്ച് ആദ്യവാരം വിജ്ഞാപനം ചെയ്യുമെന്നാണ് സൂചന.
പാകിസ്ഥാന്‍, ബംഗ്ലാദേശ്, അഫ്ഗാനിസ്ഥാന്‍ എന്നീ രാജ്യങ്ങളില്‍ നിന്നുള്ള ഹിന്ദു, ക്രിസ്ത്യന്‍, സിഖ്, ജൈന, ബുദ്ധ, പാഴ്സി മതവിഭാഗങ്ങളില്‍ പെട്ടവര്‍ക്ക് പൗരത്വം നല്‍കുന്നതിനുള്ള നടപടികളാണ് കേന്ദ്രം ആരംഭിച്ചിരിക്കുന്നത്. ലോക്സഭാ തെഞ്ഞെടുപ്പിന് മുമ്പു തന്നെ സിഎഎ നടപ്പാക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ ഉള്‍പ്പെടെയുള്ളവര്‍ വ്യക്തമാക്കിയിട്ടുണ്ട്.
2019 ഡിസംബറിലാണ് പൗരത്വ ഭേദഗതി നിയമം ലോക്സഭ പാസാക്കിയത്. 2020 ജനുവരി 10 ന് നിയമം നിലവില്‍ വന്നെങ്കിലും ചട്ടങ്ങള്‍ രൂപീകരിക്കാത്തതിനാല്‍ നടപ്പാക്കിയിരുന്നില്ല. 2014 ഡിസം. 31ന് മുമ്പ് ഭാരതത്തില്‍ എത്തിയവര്‍ക്ക് പൗരത്വത്തിനായി അപേക്ഷ നല്‍കാമെന്നായിരുന്നു വ്യവസ്ഥ. എന്നാല്‍ 2014നു ശേഷം എത്തിയവര്‍ക്കും സിഎഎയുടെ അടിസ്ഥാനത്തില്‍ പൗരത്വം നല്‍കിയേക്കും. പൗരത്വത്തിന് അപേക്ഷിക്കുന്നവര്‍ യാത്രാരേഖകളില്ലാതെ ഭാരതത്തിലെത്തിയ വര്‍ഷം വ്യക്തമാക്കണം.
പൗരത്വത്തിന് അപേക്ഷിക്കുന്നതിനുള്ള നടപടിക്രമങ്ങളെല്ലാം കേന്ദ്ര ആഭ്യന്തരമന്ത്രാലയം സജ്ജമാക്കിയ ഓണ്‍ലൈന്‍ പോര്‍ട്ടല്‍ മുഖേനയാകും. ഇതിന്റെ ട്രയല്‍ റണ്‍ പുരോഗമിക്കുകയുമാണ്. കഴിഞ്ഞ രണ്ടു വര്‍ഷത്തിനിടെ 30 ജില്ലാ മജിസ്ട്രേറ്റുമാര്‍ക്കും ഒന്‍പത് സംസ്ഥാനങ്ങളിലെ ആഭ്യന്തര സെക്രട്ടറിമാര്‍ക്കും പരിശോധനകള്‍ക്കുശേഷം പൗരത്വം നല്‍കാനുള്ള അധികാരം നല്‍കിയിട്ടുണ്ട്.
സിഎഎക്കെതിരെ തെറ്റിദ്ധാരണാജനകമായ പ്രചരണങ്ങളാണ് പ്രതിപക്ഷമായ കോണ്‍ ഗ്രസും ഇടതുപാര്‍ട്ടികളും മുസ്ലീം സംഘടനകളും രാജ്യവ്യാപകമായി നടത്തിയത്. ഇതി ന്റെ മറപിടിച്ച് സിഎഎ നടപ്പിലാക്കില്ലെന്ന് കേരളവും പശ്ചിമബംഗാളും ഉള്‍പ്പടെയുള്ള ചില സംസ്ഥാനങ്ങള്‍ നിലപാട് എടുക്കുകയും ചെയ്തിരുന്നു.
