കൊച്ചി: നടിയെ ആക്രമിച്ച കേസില് അന്വേഷണ റിപ്പോര്ട്ടിന്റെ പകര്പ്പ് അതിജീവിതയ്ക്ക് കൈമാറാന് ഹൈക്കോടതി നിര്ദേശം. മെമ്മറി കാര്ഡ് ചോര്ന്ന സംഭവത്തിലെ അന്വേഷണ റിപ്പോര്ട്ടാണ് കൈമാറേണ്ടത്. റിപ്പോർട്ടിന്റെ പകർപ്പ് നൽകണമെന്ന അതിജീവിതയുടെ ഹര്ജിയിലാണ് ഉത്തരവ്. എന്നാൽ പകര്പ്പ് വേണമെന്ന പ്രതി ദിലീപിന്റെ ആവശ്യം കോടതി അംഗീകരിച്ചില്ല.
ജസ്റ്റിസ് കെ ബാബു അധ്യക്ഷനായ സിംഗിള് ബെഞ്ചാണ് ഹര്ജി പരിഗണിച്ചത്. കേസിലെ പ്രധാന തെളിവായ മെമ്മറി കാര്ഡ് കോടതിയുടെ കസ്റ്റഡിയിലിരിക്കെ, അനുമതിയില്ലാതെ പരിശോധിച്ചതില് ജില്ലാ സെഷന്സ് ജഡ്ജാണ് അന്വേഷണം നടത്തിയത്. തുടര്ന്ന് അന്വേഷണ റിപ്പോര്ട്ട് ഹൈക്കോടതിയില് സമര്പ്പിച്ചിരുന്നു. ഇതിന്റെ പകര്പ്പ് അതിജീവിതയ്ക്ക് നല്കിയിരുന്നില്ല. അത് നൽകാനാണ് ഇപ്പോൾ കോടതി നിർദേശിച്ചിരിക്കുന്നത്.
കൊച്ചിയില് നടിയെ ആക്രമിക്കപ്പെട്ട കേസിലെ നിര്ണ്ണായക തെളിവായ മെമ്മറി കാര്ഡ് വിചാരണ സമയത്തും അതിന് മുന്പും മൂന്ന് തവണയാണ് പരിശോധിക്കപ്പെട്ടത്. ഇത് മൂന്നും രാത്രികാലത്തായിരുന്നു എന്നാണ് ഫോറന്സിക് റിപ്പോര്ട്ട്. ഇതിന്റെ അടിസ്ഥാനത്തിലാണ് അതിജീവിത ഹൈക്കോടതിയെ സമീപിച്ചതും അന്വേഷണത്തിന് ഉത്തരവിട്ടതും.
