ഫാസ് ടാഗ് നല്‍കാന്‍ അധികാരമുള്ള ബാങ്കുകളുടെ പട്ടികയില്‍നിന്ന് പേടിഎം പേമെന്‍റ് ബാങ്കിനെ റിസര്‍വ്വ് ബാങ്ക് ഒഴിവാക്കി
ന്യൂദല്‍ഹി: ദേശീയപാതകളില്‍ വാഹനങ്ങള്‍ക്ക് ടോള്‍ നല്‍കുന്നതിനുള്ള ഫാസ് ടാഗ് പുറത്തിറക്കാന്‍ ഇനി പേടിഎമ്മിന് കഴിയില്ല. ഫാസ് ടാഗ് നല്‍കാന്‍ അധികാരമുള്ള ബാങ്കുകളുടെ പട്ടികയില്‍നിന്ന് റിസര്‍വ്വ് ബാങ്ക് പേടിഎം പേയ്മെന്റ് ബാങ്കിനെ ഒഴിവാക്കിയത്. പക്ഷെ മാര്‍ച്ച് 15വരെ പേടിഎം ഫാസ് ടാഗ് ഉപയോഗിക്കാം. മാര്‍ച്ച് 15 വരെ പേ ടിഎം ഫാസ് ടാഗുകളില്‍ പണമിടാം. പക്ഷെ അതിന് ശേഷം അത് ചെയ്യാനാവില്ല.
പേടിഎം ഫാസ് ടാഗുകള്‍ ഉപയോഗിക്കുന്നവര്‍ മറ്റേതെങ്കിലും ബാങ്ക് നല്‍കുന്ന ഫാസ് ടാഗുകള്‍ വാങ്ങി വാഹനത്തില്‍ പതിയ്‌ക്കണം.
പേടിഎം പേമെന്‍റ് പേമെന്‍റ് ബാങ്കിനെ ഫാസ് ടാഗ് നല്‍കാനുള്ള അധികാരത്തില്‍ നിന്നും നീക്കം ചെയ്ത റിസര്‍വ്വ് ബാങ്ക് തീരുമാനത്തെ ഇന്ത്യന്‍ ഹൈവേയ്‌സ് മാനേജ്‌മെന്റ് കമ്പനി (ഐഎച്ച്എംസിഎല്‍) മാര്‍ച്ച് 15ന് ശേഷം നടപ്പാക്കും. സുഗമമായ ഹൈവേ യാത്രയ്‌ക്ക് 32 അംഗീകൃത ബാങ്കുകളില്‍നിന്നുള്ള ഫാസ്ടാഗ് വാങ്ങാന്‍ ഐഎച്ച്എംസിഎല്‍ ട്വിറ്റര്‍ പോസ്റ്റിലൂടെ യാത്രക്കാരോട് ആവശ്യപ്പെട്ടു. പട്ടികയില്‍ പേടിഎം പേയ്മെന്റ് ബാങ്ക് ഇല്ല.
എയര്‍ടെല്‍ പേയ്മെന്റ് ബാങ്ക്, അലഹാബാദ് ബാങ്ക്, ബാങ്ക് ഒഫ് ബറോഡ, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, പഞ്ചാബ് നാഷനല്‍ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, യെസ് ബാങ്ക് തുടങ്ങി 32 ഓളം ബാങ്കുകള്‍ക്ക് ഈ അധികാരം നല്‍കിയിട്ടുണ്ട്.
പേടിഎമ്മിനെതിരെ റിസര്‍വ്വ് ബാങ്ക് നടപടിക്ക് കാരണമെന്ത്?
ജനവരി 31നാണ് പേടിഎമ്മിനു നിയന്ത്രണങ്ങള്‍ ഏര്‍പ്പെടുത്തി റിസര്‍വ് ബാങ്ക് ഉത്തരവിറക്കിയത്. 2022ല്‍ പുതിയ ഉപഭോക്താക്കളെ ചേര്‍ക്കരുതെന്ന് റിസര്‍വ്വ് ബാങ്ക് വിലക്കിയിട്ടും പേടിഎം പേമെന്‍റ് ബാങ്ക് പുതിയ ഉപഭോക്താക്കളെ ചേര്‍ത്തുകൊണ്ടിരുന്നു. ചൈനയില്‍ നിന്നുള്ള വ്യവസായി ജാക് മാ സ്ഥാപിച്ച് ആന്‍റ് എന്ന കമ്പനിയുടെ നിക്ഷേപം സ്വീകരിച്ചുകൊണ്ടുള്ള പേടിഎം ഉടമ വിജയ് ശേഖറിന്റെ നീക്കവും റിസര്‍വ്വ് ബാങ്കിന് സംശയത്തോടെയാണ് വീക്ഷിച്ചത്. കഴിഞ്ഞ വര്‍ഷം ചൈനീസ് കമ്പനി ആന്‍റുമായുള്ള ബന്ധം പേ ടിഎം അവസാനിപ്പിച്ചിരുന്നു. പക്ഷെ റിസ്ക് മാനേജ്മെന്‍റിന്റെ കാര്യത്തില്‍ ഇന്ത്യയിലെ ധനകാര്യസ്ഥാപനങ്ങള്‍ വീഴ്ചവരുത്തുന്നതായി റിസര്‍വ്വ് ബാങ്ക് ഗവര്‍ണര്‍ ശക്തികാന്ത ദാസ് താക്കീത് നല്‍കിയിരുന്നു. ഇക്കൂട്ടത്തില്‍ പേടിഎം പേമെന്‍റ് ബാങ്കും ഉണ്ടായിരുന്നു. നിയന്ത്രണങ്ങളില്ലാതെ വായ്പ നല്‍കുന്നത് ഗുരുതരമായ സാമ്പത്തിക പ്രതിസന്ധിയുണ്ടാക്കുമെന്നും ശക്തികാന്ത ദാസ് താക്കീത് നല്‍കിയിരുന്നു. ഇതിന് പിന്നാലെയാണ് പേ ടിഎമ്മിനെതിരായ നടപടി ഉണ്ടായിരിക്കുന്നത്. രണ്ട് ലക്ഷത്തില്‍ കൂടുതല്‍ നിക്ഷേപിക്കാന്‍ പാടില്ലാത്ത ലൈസന്‍സാണ് റിസര്‍വ്വ് ബാങ്ക് നല്‍കിയിരുന്നതെങ്കിലും അതിനേക്കാള്‍ കൂടുതല്‍ തുക നിക്ഷേപങ്ങള്‍ വാങ്ങി പേടിഎം നിയമലംഘനം നടത്തിക്കൊണ്ടിരുന്നു എന്നത് മറ്റൊരു വസ്തുതയാണ്.
മാത്രമല്ല, പേടിഎം പേമെന്‍റ് ബാങ്ക് പല അക്കൗണ്ടുകളും തുറന്നിരിക്കുന്നത് കെവൈസി വാങ്ങാതെയാണെന്ന പരാതിയും ഉണ്ട്. സേവിംഗ്സ് അക്കൗണ്ടുകള്‍ തുറക്കുമ്പോള്‍ ‘ഉപഭോക്താവിനെ അറിയുക’ (നോ യുവര്‍ കസ്റ്റമര്‍) എന്ന വ്യവസ്ഥകള്‍ പിന്തുടരേണ്ടതുണ്ട്. ഇത് പാലിച്ചിട്ടില്ല. നിക്ഷേപം സ്വീകരിക്കുന്ന, വായ്പ നല്‍കുന്ന ഉപഭോക്താക്കളുടെ മുഴുവന്‍ വിശദാംശങ്ങളും ബാങ്കുകള്‍ കെവൈസി അനുസരിച്ച് സ്വീകരിക്കേണ്ടതുണ്ട്. എങ്കില്‍ മാത്രമേ ഇടപാടുകളുടെ സുതാര്യത പരിശോധിക്കാന്‍ റിസര്‍വ്വ് ബാങ്കിന് ആകൂ.
പുതുതായി റിസര്‍വ്വ് ബാങ്ക് പേ ടിഎമ്മിന് ചില ഇളവുകള്‍ നല്കി. നേരത്തെ ഫെബൂവരി 29 കഴിഞ്ഞാല്‍ പേടിഎം പേമെന്‍റ് ബാങ്കുകള്‍ നിക്ഷേപം സ്വീകരിക്കാനോ വാലറ്റുകള്‍ ടോപ് അപ്പ് ചെയ്യാനോ പാടില്ലായിരുന്നു. എന്നാല്‍ ഈ അവസാന തീയതി മാര്‍ച്ച് 15 വരെ നീട്ടിക്കൊണ്ട് കഴിഞ്ഞ ദിവസം റിസര്‍വ്വ് ബാങ്ക് ഉത്തരവിട്ടിരുന്നു.
വ്യാപാരികള്‍ക്ക് ഭയം വേണ്ട, പേ ടിഎം ക്യൂആര്‍, യുപിഐ സൗണ്ട് ബോക്സ് എന്നിവ മാര്‍ച്ച് 15ന് ശേഷവും ഉപയോഗിക്കാം
പേ ടിഎം ക്യൂആര്‍, യുപിഐ സൗണ്ട് ബോക്സ് എന്നിവ കടകളില്‍ ഉപയോഗിച്ചുവരുന്ന വ്യാപാരികള്‍ പേടിക്കേണ്ടതില്ല. പേ ടിഎം ക്യൂആര്‍, യുപിഐ സൗണ്ട് ബോക്സ്, പിഒഎസ് മെഷീന്‍ എന്നിവ മാര്‍ച്ച് 15ന് ശേഷവും ഉപയോഗിക്കാം. ഇതിന് റിസര്‍വ്വ് ബാങ്ക് നിയന്ത്രണങ്ങള്‍ ഇല്ല. പക്ഷെ വ്യാപാരികള്‍ പേ ടിഎം ക്യൂആര്‍, യുപിഐ സൗണ്ട് ബോക്സ്, പിഒഎസ് മെഷീന്‍ എന്നിവയെ പേടിഎം പേമെന്‍റ് ബാങ്കുമായാണ് ബന്ധപ്പെടുത്തിയിരിക്കുന്നതെങ്കില്‍ അവര്‍ അത് മാറ്റി മറ്റൊരു ബാങ്കുമായി ഇവയെ ബന്ധിപ്പിക്കണം. ഇപ്പോള്‍ മറ്റ് ബാങ്ക് അക്കൗണ്ടുകളാണ് ഇതിന് ഉപയോഗിക്കുന്നതെങ്കില്‍ പ്രശ്നമില്ല.
പേടിഎം അവരുടെ ആഭ്യന്തര നോഡല്‍ അക്കൗണ്ട് ആക്സിസ് ബാങ്കിലേക്ക് മാറ്റി
ഇതിനിടെ പേടിഎം അവരുടെ ആഭ്യന്തര നോഡല്‍ അക്കൗണ്ട് ആക്സിസ് ബാങ്കിലേക്ക് മാറ്റി. നോഡല്‍ അക്കൗണ്ട് എന്നത് പേടിഎമ്മിന്റെ മാതൃകമ്പനിയായ വണ്‍97 കമ്മ്യൂണിക്കേഷന്‍സിന്റെ പേരില്‍ തുറക്കുന്ന ബാങ്ക് അക്കൗണ്ട് തന്നെയാണ്. ഇതോടെ പേ ടിഎം ക്യൂആര്‍, യുപിഐ സൗണ്ട് ബോക്സ്, പിഒഎസ് മെഷീന്‍ എന്നിവ ഉപയോഗിക്കുന്ന വ്യാപാരികള്‍ക്ക് ഇനിയും തടസ്സമില്ലാതെ അവരുടെ ഇടപാടുകള്‍ തുടരാം. ഈ ആവശ്യത്തിന് പേടിഎം പേമെന്‍റ് ബാങ്കില്‍ അക്കൗണ്ടുകള്‍ ആരംഭിച്ച വ്യാപാരികള്‍ക്ക് പകരം ആക്സിസ് ബാങ്ക് അക്കൗണ്ടുകള്‍ ലഭിക്കും. അതേ സമയം പേടിഎം പേമെന്‍റ് ബാങ്കിലെ അക്കൗണ്ടുകള്‍ മാര്‍ച്ച് 15ന് ശേഷം റിസര്‍വ്വ് ബാങ്ക് മരവിപ്പിക്കും.
പ്രതികരിക്കാൻ ഇവിടെ എഴുതുക: