ജാർഖണ്ഡിൽ നക്സലാക്രമണം : രണ്ട് സുരക്ഷാ ഭടൻമാർ വീരമൃത്യു വരിച്ചു

റാഞ്ചി: ബുധനാഴ്ച ജാർഖണ്ഡിലെ ഛത്ര ജില്ലയിൽ നക്സലൈറ്റുകളും പോലീസും തമ്മിലുണ്ടായ ഏറ്റുമുട്ടലിൽ രണ്ട് സുരക്ഷാ ഉദ്യോഗസ്ഥർ കൊല്ലപ്പെടുകയും ഒരാൾക്ക് പരിക്കേൽക്കുകയും ചെയ്തു. ജാർഖണ്ഡ് തലസ്ഥാനമായ റാഞ്ചിയിൽ നിന്ന് 200 കിലോമീറ്റർ അകലെ സദർ, ബാസിത്ത്നഗർ ജോറി പോലീസ് സ്റ്റേഷൻ പരിധികൾക്കിടയിലുള്ള ബൈരിയോ വനത്തിലാണ് സംഭവം നടന്നതെന്ന് ഉദ്യോഗസ്ഥർ വ്യക്തമാക്കി.

സംഭവത്തിൽ രണ്ട് ഉദ്യോഗസ്ഥർ കൊല്ലപ്പെട്ടതായി ഐജി അമോൽ വി ഹോമകർ സ്ഥിരീകരിച്ചു. ഗയയിലെ വസീർഗഞ്ചിൽ താമസിക്കുന്ന സിക്കന്ദർ സിംഗ്, ജാർഖണ്ഡിലെ പലാമു സ്വദേശി സുകൻ റാം എന്നിവരാണ് മരിച്ചത്. വെടിയേറ്റ് പരിക്കേറ്റ ജവാൻ ആകാശ് സിങ്ങിനെ ചികിത്സയ്‌ക്കായി റാഞ്ചിയിൽ എത്തിച്ചതായി ഛത്ര സബ് ഡിവിഷണൽ പോലീസ് ഓഫീസർ സന്ദീപ് സുമൻ പറഞ്ഞു.

സുരക്ഷാ ഉദ്യോഗസ്ഥർ ഒരു ഓപ്പറേഷൻ കഴിഞ്ഞ് മടങ്ങുന്നതിനിടെയാണ് തൃത്യ സമ്മേളന പ്രസ്തുതി കമ്മിറ്റിയുടെ (ടിഎസ്പിസി) ആക്രമണത്തിന് ഇരയായതെന്ന് സുമൻ പറഞ്ഞു. രണ്ട് സുരക്ഷാ ഉദ്യോഗസ്ഥരുടെ മരണത്തിൽ ജാർഖണ്ഡ് മുഖ്യമന്ത്രി ചമ്പായി സോറൻ ദുഃഖം രേഖപ്പെടുത്തുകയും മരിച്ചവരുടെ കുടുംബാംഗങ്ങൾക്കൊപ്പം സർക്കാർ നിലകൊള്ളുകയും അവർക്ക് സാധ്യമായ എല്ലാ സഹായവും നൽകുമെന്നും അദ്ദേഹം പറഞ്ഞു.

ഈ സേനാംഗങ്ങളുടെ ത്യാഗം പാഴാകില്ലെന്നും നക്സൽ പ്രവർത്തനങ്ങൾ തടയാൻ ആവശ്യമായ എല്ലാ നടപടികളും സർക്കാർ സ്വീകരിക്കുന്നുണ്ടെന്നും മുഖ്യമന്ത്രി ഔദ്യോഗിക പ്രസ്താവനയിൽ പറഞ്ഞു.

പരിക്കേറ്റവർക്ക് ശരിയായ ചികിത്സ ഉറപ്പാക്കാൻ പോലീസ് ഡയറക്ടർ ജനറലിനോട് മുഖ്യമന്ത്രി നിർദ്ദേശിക്കുകയും ചെയ്തു.